ഋഷഭ് പന്തിനെ അറ്റാക്കിംഗ് ബാറ്റ്സ്മാന്‍ എന്ന നിലയിൽ ടീം ഇനിയും പിന്തുണയ്ക്കുമെന്ന് അറിയിച്ച് മുഖ്യ കോച്ച് രാഹുല്‍ ദ്രാവിഡ്. എന്നാൽ താരത്തിന്റെ ഷോട്ട് സെലക്ഷനെക്കുറിച്ച് അദ്ദേഹവുമായി സംസാരിക്കുമെന്നും ദ്രാവിഡ് വ്യക്തമാക്കി.
കാഗിസോ റബാഡയ്ക്കെതിരെ പുറത്തിറങ്ങി അടിക്കുവാന്‍ ശ്രമിച്ചാണ് പന്ത് പൂജ്യത്തിന് പുറത്തായത്. വളരെ നിര്‍ണ്ണായക ഘട്ടത്തിൽ പന്ത് വിക്കറ്റ് വലിച്ചെറിഞ്ഞതിനെ സുനിൽ ഗവാസ്കര്‍ ഉള്‍പ്പെടെ പല മുന്‍ താരങ്ങളും വിമര്‍ശിച്ചിരുന്നു.
ഋഷഭ് പന്ത് ഈ ശൈലിയിലാണ് കളിക്കുന്നതെന്നും അത് താരത്തിനും ടീമിനും ഗുണം ചെയ്തിട്ടുണ്ടെന്നും പറഞ്ഞ രാഹുല്‍ ദ്രാവിഡ് എന്നാൽ ഷോട്ട് സെലക്ഷനെക്കുറിച്ച് തീര്‍ച്ചയായും താരവുമായി സംസാരിക്കുമെന്ന് അറിയിച്ചു.
