ബൗളിംഗ് ആക്ഷന്‍ പരിശോധനയ്ക്കായി ലാഹോറിലെ യൂണിവേഴ്സിറ്റി ഓഫ് മാനേജ്മെന്റ് സയന്‍സസിന് അനുമതി നല്‍കി ഐസിസി. ഔദ്യോഗിക പരിശോധന കേന്ദ്രമായാണ് ഐസിസി ഈ കേന്ദ്രത്തെ അംഗീകരിക്കുന്നത്. ലോകത്തിലെ ഇത്തരത്തില്‍ അംഗീകാരം ലഭിച്ച അഞ്ചാമത്തെ കേന്ദ്രമാണ് ലാഹോറിലേത്. ബ്രിസ്ബെയിനിലെ നാഷണല്‍ ക്രിക്കറ്റ് സെന്റര്‍, ചെന്നൈയിലെ ശ്രീ രാമചന്ദ്ര യൂണിവേഴ്സിറ്റി, ലൗഗ്ബറോ യൂണിവേഴ്സിറ്റി, യൂണിവേഴ്സിറ്റി ഓഫ് പ്രിട്ടോറിയ എന്നിവയാണ് മറ്റ് അംഗീകൃത കേന്ദ്രങ്ങള്‍.
ലാഹോറിലെ കേന്ദ്രവുമായി സഹകരിച്ച് പ്രവര്‍ത്തിച്ച പാക്കിസ്ഥാന്‍ ക്രിക്കറ്റ് ബോര്‍ഡിനെ അനുമോദിക്കുവാനും ഐസിസി ക്രിക്കറ്റ് ജനറല്‍ മാനേജര്‍ ജെഫ് അല്ലാര്‍ഡൈസ് തയ്യാറായി. തെറ്റായ ആക്ഷനുകള്‍ തിരുത്തുവാനുള്ള പാക്കിസ്ഥാന്‍ ക്രിക്കറ്റ് ബോര്‍ഡിന്റെ പ്രതിബദ്ധതയെ ഇത് സൂചിപ്പിക്കുന്നു എന്നും ജെഫ് പറഞ്ഞു.
