എ എഫ് സി കപ്പ് പ്ലേ ഓഫിന്റെ രണ്ടാം പാദത്തിൽ വിജയം നേടി ചെന്നൈയിൻ എഫ് സി എ എഫ് സി കപ്പ് ഗ്രൂപ്പ് ഘട്ടത്തിലേക്ക് കടന്നു. ഇന്ന് അഹമ്മദാബാദിൽ വെച്ച് നടന്ന പോരാട്ടത്തിൽ കൊളംബോ എഫ് സിയെ എതിരില്ലാത്ത ഒരു ഗോളിനാണ് ചെന്നൈയിൻ പരാജയപ്പെടുത്തിയത്‌. ശ്രീലങ്കയിൽ നടന്ന ആദ്യ പാദ മത്സരം ഗോൾ രഹിതമായി അവസാനിച്ചിരുന്നു.
ആദ്യ പാദത്തിൽ എന്ന പോലെ ഇന്നും വിരസമായ മത്സരമാണ് എ എഫ് സി കപ്പിൽ ചെന്നൈയിന്റെ ഭാഗത്തു നിന്ന് കാണാൻ കഴിഞ്ഞത്. പക്ഷെ രണ്ടാം പകുതിയിൽ ലഭിച്ച അവസരം മുതലാക്കി ലക്ഷ്യം കണ്ട ജെജെ ചെന്നൈയിനെ രക്ഷിക്കുകയായിരുന്നു. മലയാളി താരം സി കെ വിനീത് ഇന്ന് ചെന്നൈയിന്റെ ആദ്യ ഇലവനിൽ തന്നെ ഉണ്ടായിരു‌ന്നു. ഈ വിജയത്തോടെ എ എഫ് സി കപ്പ് ഗ്രൂപ്പ് ഘട്ടത്തിലേക്ക് ചെന്നൈയിൻ കടന്നു. മിനേർവ പഞ്ചാബും എ എഫ് സി കപ്പ് ഗ്രൂപ്പ് ഘട്ടത്തിൽ ഇന്ത്യയെ പ്രതിനിധീകരിച്ച് കളിക്കുന്നുണ്ട്.
ആദ്യമായാണ് ഐ എസ് എല്ലിനെ പ്രതിനിധീകരിച്ച് ഒരു ടീം എ എഫ് സി കപ്പിൽ കളിക്കുന്നത്.
