ന്യൂഡൽഹിയിൽ നടക്കുന്ന വനിതാ ലോക ബോക്സിംഗ് ചാമ്പ്യൻഷിപ്പിൽ ഇന്ത്യക്ക് മികച്ച തുടക്കം. നിലവിലെ ചാമ്പ്യൻ നിഖത് സറീൻ 50 കിലോഗ്രാം വിഭാഗത്തിൽ അസർബൈജാന്റെ അനഖാനിം ഇസ്മയിലോവയ്ക്കെതിരെ മികച്ച വിജയത്തോടെ റൗണ്ട് ഓഫ് 32-ലേക്ക് കടന്നു. മത്സരത്തിൽ നിഖത്ത് ആധിപത്യം പുലർത്തിയതിനാൽ റഫറി രണ്ടാം റൗണ്ടിൽ തന്നെ മത്സരം നിർത്തി വെക്കുക ആയിരുന്നു. അനഖാനിമിന് മൂന്ന് സ്റ്റാൻഡിംഗ് കൗണ്ട് ലഭിച്ചു.
“എന്റെ വിജയത്തോടെ ഇന്ത്യയുടെ പ്രചാരണം ആരംഭിച്ചതിൽ എനിക്ക് സന്തോഷമുണ്ട്. ഞാൻ മുമ്പ് അനഖാനിമിനെ നേരിട്ടുണ്ട്. അവളുടെ ഗെയിംപ്ലാൻ അനുസരിച്ച് എന്റെ പദ്ധതികൾ തയ്യാറാക്കിയിരുന്നു, അത് എന്നെ സഹായിച്ചു,” പോരാട്ടത്തിന് ശേഷം ആത്മവിശ്വാസത്തോടെ നിഖത് പറഞ്ഞു.