ചുഴലിക്കാറ്റ് ജപ്പാനിൽ നടക്കുന്ന റഗ്ബി ലോകകപ്പ് ഫോർമുല വൺ റേസ് എന്നിവക്ക് വലിയ ഭീഷണി ആയെങ്കിലും ഒടുവിൽ ഉദ്ദേശിച്ച പോലെ റേസ് നടത്താൻ സംഘാടകർ ആയി. കഴിഞ്ഞ കുറേ ഗ്രാന്റ്‌ പ്രീ കളിൽ ഫെരാരി നേടിയ ആധിപത്യം തിരിച്ചു പിടിക്കുന്ന മെഴ്‌സിഡസിനെയാണ് ജപ്പാനിലും കാണാൻ സാധിച്ചത്. ജപ്പാനിൽ ഫെരാരിയുടേതും സഹതാരം ലൂയിസ് ഹാമിൾട്ടന്റെയും വെല്ലുവിളി അതിജീവിച്ച ബോട്ടാസ് ഒരു ഇടവേളയ്ക്ക് ശേഷം പോഡിയത്തിൽ ഒന്നാമത് എത്തുന്ന കാഴ്ചക്ക് ആണ് ജപ്പാൻ സാക്ഷിയായത്.
രണ്ടാം സ്ഥാനത്ത് ഫെരാരിയുടെ വെറ്റൽ എത്തിയപ്പോൾ മൂന്നാമത് ആയിരുന്നു ഹാമിൾട്ടന്റെ സ്ഥാനം. ഇതോടെ ഉടമസ്ഥരുടെ മത്സരത്തിൽ കിരീടം ഉറപ്പിക്കാനും മെഴ്‌സിഡസിന് ആയി. അതേസമയം കഴിഞ്ഞ കുറേ ഗ്രാന്റ്‌ പ്രീകളിൽ സ്വപ്നതുല്യ പ്രകടനം നടത്തിയ ഫെരാരിയുടെ യുവ ഡ്രൈവർ ചാൾസ്‌ ലെക്ലെർക്ക് അഞ്ചാം സ്ഥാനത്ത് ആണ് റേസ് അവസാനിപ്പിച്ചത്. അതേസമയം റെഡ് ബുള്ളിന്റെ യുവ ഡ്രൈവർ മാർക്‌സ് വേർസ്റ്റാപ്പനു റേസ് പൂർത്തിയാക്കാനും സാധിച്ചില്ല. ഡ്രൈവർമാരുടെ പോരാട്ടത്തിൽ ലീഡ് കുറക്കാൻ ജയത്തോടെ ബോട്ടാസിന് ആയെങ്കിലും ഹാമിൽട്ടൻ ഇപ്പോഴും ബഹുദൂരം മുന്നിൽ തന്നെയാണ്.
