വൈറൽ ന്യുമോണിയ ബാധിച്ച് അഞ്ച് ദിവസനായി ആശുപത്രിയിൽ ആയിരുന്ന ഇന്ത്യൻ ഇന്റർനാഷണലും അറ്റാക്കിംഗ് മിഡ്ഫീൽഡറുമായ ഷിൽജി ഷാജിയെ ഇന്ന് ഡിസ്ചാർജ് ചെയ്തു. പൂർണ്ണ സുഖം പ്രാപിക്കുന്നതുവരെ ഷിൽജി അടുത്ത കുറച്ച് ദിവസത്തേക്ക് ഡൽഹിയിൽ ഒരു സ്വകാര്യ പരിചരണത്തിൽ തുടരും എന്ന് എ ഐ എഫ് എഫ് അറിയിച്ചു.
AFC വിമൻസ് U17 ഏഷ്യൻ കപ്പ് ക്വാളിഫയർ റൗണ്ട് 1 ടൂർണമെന്റ് കളിക്കാൻ കിർഗിസ് റിപ്പബ്ലിക്കിലെ ഭിസ്കെക്കിലേക്ക് ഇന്ത്യ അണ്ടർ 17 വനിതാ ടീം പുറപ്പെടുന്നതിന് ഒരു രാത്രി മുമ്പാണ് ഇൻഡോറിൽ 16 വയസ്സുകാരിയായ മലയളിതാരം അസുഖബാധിതയായത്. ഓൾ ഇന്ത്യ ഫുട്ബോൾ ഫെഡറേഷന്റെ മെഡിക്കൽ ടീമിന്റെ മേൽനോട്ടത്തിൽ കൂടുതൽ മെഡിക്കൽ പരിശോധനകൾക്കും ചികിത്സയ്ക്കുമായി ഷിൽജിയെ ഡൽഹിയിലേക്ക് കൊണ്ടുവരികയായിരുന്നു.
“എഎഫ്സി യോഗ്യതാ മത്സരത്തിന്റെ ആദ്യ റൗണ്ട് നഷ്ടമായത് നിരാശാജനകമാണ്. അതിനായി ഞാൻ കാത്തിരിക്കുകയായിരുന്നു. എന്നിരുന്നാലും, മാനസികമായി ഞാൻ അവരോടൊപ്പമുണ്ടെന്ന് പെൺകുട്ടികളോട് പറയാൻ ഞാൻ ആഗ്രഹിക്കുന്നു” ഷിൽഹി ഷാജി പറഞ്ഞു.