സീരി എയിൽ യുവന്റസ് വിജയ വഴിയിലേക്ക് തിരികെയെത്തി. ഇന്ന് എവേ മത്സരത്തിൽ കലിയരിയെ നേരിട്ട യുവന്റസ് ഒന്നിനെതിരെ രണ്ടു ഗോളുകൾക്കാണ് വിജയിച്ചത്. തുടക്കത്തിൽ ഒരു ഗോളിന് പിറകിൽ പോയ ശേഷമായിരുന്നു വിജയം. പത്താം മിനുട്ടിൽ ജാവീ പെഡ്രോ ആണ് കലിയരിക്ക് ലീഡ് നൽകിയത്. 23ആം മിനുട്ടിൽ റബിയോയിലൂടെ ഒരു ഗോൾ യുവന്റസ് മടക്കി എങ്കിലും നിഷേധിക്കപ്പെട്ടു.
ആദ്യ പകുതിയുടെ അവസാനം ഡിലിറ്റ് ആണ് യുവന്റസിന് സമനില നൽകിയത്. 75ആം മിനുട്ടിൽ വ്ലാഹോവിചിന്റെ ഗോളാണ് യുവന്റസിന് വിജയം നൽകിയത്. ഈ വിജയത്തോടെ യുവന്റസ് 32 മത്സരങ്ങളിൽ നിന്ന് 62 പോയിന്റുമായി നാലാമത് നിൽക്കുകയാണ്.