മാഞ്ചസ്റ്റർ യുണൈറ്റഡ് ഇതിഹാസം റൂഡ് വാൻ നിസ്റ്റൽറൂയ് ക്ലബിലേക്ക് തിരികെ വരും എന്ന് റിപ്പോർട്ടുകൾ. നിസ്റ്റൽ റൂയിയെ സഹപരിശീലകനായി എത്തിക്കാൻ യുണൈറ്റഡ് ശ്രമിക്കുന്നതായൊ ഫബ്രിസിയോ റൊമാനോ റിപ്പോർട്ട് ചെയ്യുന്നു. ഇതു സംബന്ധിച്ചുള്ള ചർച്ചകൾ വേഗത്തിൽ പുരോഗമിക്കുക ആണെന്നും അദ്ദേഹം പറയുന്നു.
ഇംഗ്ലീഷ് ക്ലബായ ബേർൺലിയുടെ പരിശീലകൻ ആകാനും നിസ്റ്റൽ റൂയിക്ക് മുന്നിൽ ഓഫർ ഉണ്ട്. ഇതിൽ ഏതാകും ഡച്ച് ഇതിഹാസം തിരഞ്ഞെടുക്കുക എന്നതാണ് ഏവരും ഉറ്റുനോക്കുന്നത്. ചാമ്പ്യൻഷിപ്പിലേക്ക് റിലഗേറ്റ് ആയ ബേർൺലിയുടെ പരിശീലകൻ കൊമ്പനി രാജിവെച്ച് ബയേണിലേക്ക് പോയിരുന്നു. അവസാനം പി എസ് വിയെ ആണ് നിസ്റ്റൽ റൂയ് പരിശീലിപ്പിച്ചത്.
ഒരു വർഷം മുമ്പ് പി എസ് വി പരിശീലക സ്ഥാനം അദ്ദേഹം രാജിവെച്ചിരുന്നു. മികച്ച പ്രകടനം ആയിരുന്നിട്ടും ക്ലബ് മാനേജ്മെന്റുമായി ഉടക്കിയതാണ് PSV ഐന്തോവന്റെ മുഖ്യ പരിശീലകനെന്ന സ്ഥാനം നിസ്റ്റൽറൂയ് രാജിവെക്കാൻ കാരണമായത്. നെതർലൻഡ്സ് ക്ലബ്ബിന്റെ മുഖ്യ പരിശീലകനെന്ന നിലയിലുള്ള തന്റെ ആദ്യ സീസണിൽ, വാൻ നിസ്റ്റൽറൂയ് ഡച്ച് കപ്പും ഡച്ച് സൂപ്പർ കപ്പും നേടിയിരുന്നു.
ഒപ്പം ഡച്ച് ലീഗിൽ രണ്ടാം സ്ഥാനം നേടാനും അദ്ദേഹത്തിനായിരുന്നു. പി എസ് വിയെ 51 മത്സരങ്ങളിൽ പരിശീലിപ്പിച്ച നിസ്റ്റൽറൂയ് 33 വിജയങ്ങൾ സ്വന്തമാക്കിയിരുന്നു.