ഇന്നലെ കമ്മ്യൂണിറ്റി ഷീൽഡിൽ 8 മിനുട്ടിന്റെ ഇഞ്ച്വറി ടൈം നൽകിയത് വിമർശനങ്ങൾ ഉയർത്തിയിരുന്നു. ആ ഇഞ്ച്വറി ടൈമിന്റെ അവസാന നിമിഷം ആഴ്സണൽ ഗോൾ നേടി സമനില സ്വന്തമാക്കുകയും പിന്നീട് വിജയിക്കുകയും ചെയ്തിരുന്നു. കഴിഞ്ഞ ലോകകപ്പിലും ഇതുപോലെ ദീർഘനേരം ഇഞ്ച്വറി ടൈമുകൾ നൽകിയിരുന്നു. ടീമുകൾ വെറുതെ സമയം കളയുന്നത് കുറക്കാനായിരുന്നു ഈ നടപടി. ഇത്തവണ പ്രീമിയർ ലീഗിൽ ഇങ്ങനെ ദീർഘനേരം ഇഞ്ച്വറി ടൈം നൽകും എന്നാണ് സൂചനകൾ.
ഇങ്ങനെ നൽകുന്നത് നല്ലതാണെന്നും ടീമുകൾ സമയം കളയാതെ കളിയിൽ ശ്രദ്ധ കൊടുക്കാൻ ഇത് കാരണം ആകും എന്നും ആഴ്സണൽ പരിശീലകൻ അർട്ടേറ്റ പറഞ്ഞു.
“ഇത് ചെയ്യുന്നത് വളരെ നല്ലതാണെന്ന് ഞാൻ കരുതുന്നു, കാരണം അടുത്ത കാലത്തായി ടൈം വെയിസ്റ്റിംഗ് അതിന്റെ ഏറ്റവും മോശം രീതിയിലേക്ക് പോവുകയാണ്, ഇപ്പോൾ ടീമുകൾ സമയം കളയും മുമ്പ് രണ്ടുതവണ ചിന്തിക്കേണ്ടി വരും,” അർട്ടേറ്റ പറഞ്ഞു. “ഇപ്പോൾ എല്ലാ ടീമും 100 മിനിറ്റ് കളിക്കാൻ തയ്യാറായി ഇറങ്ങണം, കാരണം ഇതു പോലെ എല്ലാ ആഴ്ചയും സംഭവിക്കും.” അർട്ടേറ്റ കൂട്ടിച്ചേർത്തു.