ലാലിഗയിലെ ഇന്ന് നടന്ന മത്സരത്തിൽ റയൽ മാഡ്രിഡിന് സമനില. ഇന്ന് വിയ്യറയലിനെ നേരിട്ട റയൽ മാഡ്രിഡ് ഒരു ഘട്ടത്തിൽ 4-1ന്റെ ലീഡിൽ ഉണ്ടായിരുന്നതാണ്. ആ ലീഡിൽ നിന്നാണ് 4-4 എന്ന സമനിലയിലേക്ക് കളി എത്തിയത്. നാലു ഗോളുകളുമായി അലക്സാണ്ടർ സ്ലോത്താണ് റയലിനെതിരെ ഗംഭീര പ്രകടനം കാഴ്ചവച്ച് വിയ്യറയലിന് സമനില നേടികൊടുത്തത്.
തുടക്കത്തിൽ 14ആം മിനുട്ടിൽ ആർദ ഗുളറിലൂടെ ആണ് റയൽ ഗോളടി തുടങ്ങിയത്. 30ആം മിനുട്ടിൽ ഹൊസേലുവിലൂടെ ലീഡ് ഇരട്ടിയാക്കി. 39ആം മിനുട്ടിൽ സൊർലോത്തിലൂടെ വിയ്യറയൽ ഒരു ഗോൾ മടക്കി. 40ആം മിനുട്ടിൽ ലുകസ് വസ്കസും 45ആം മിനുട്ടിൽ ആർദ ഗുലറും കൂടെ ഗോൾ നേടിയതോടെ റയൽ 4-1ന്റെ ലീഡിൽ എത്തി.
രണ്ടാം പകുതിയിൽ ആയിരുന്നു വിയ്യറയലിന്റെ തിരിച്ചുവരവ്. 48ആം മിനുട്ടിൽ സൊർലോതിന്റെ രണ്ടാം ഗോൾ. സ്കോർ 4-2. പിറകെ 52ആം മിനുട്ടിലും 56ആം മിനുട്ടിലും സൊർലോത് വീണ്ടും ഗോൾ നേടി. സ്കോർ 4-1ൽ നിന്ന് 8 മിനുട്ട് കൊണ്ട് 4-4 എന്നായി. അവസാന മൂന്ന് ഗോളുകളും സൊർലോതിന് ഒരുക്കി നൽകിയത് മൊറേനോ ആയിരുന്നു.
ഈ സമനിലയോടെ റയൽ മാഡ്രിഡ് 94 പോയിന്റിൽ നിൽക്കുകയാണ്. ഇനിയും ഒരു ലീഗ് മത്സരം കൂടെ റയലിന് ഉണ്ട്.