റയൽ മാഡ്രിഡിൽ താൻ സന്തോഷവാനാണെന്ന് റയൽ മാഡ്രിഡിന്റെ പ്രതിരോധ താരം മാഴ്സെലോ. യുവന്റസിലേക്ക് താൻ മാറുമെന്ന അഭ്യൂഹങ്ങൾക്കിടയിലാണ് താരത്തിന്റെ പ്രതികരണം. റയൽ മാഡ്രിഡ് ടെലിവിഷന് അനുവദിച്ച അഭിമുഖത്തിലാണ് മാഴ്സെലോ താൻ റയൽ മാഡ്രിഡിൽ തന്നെ തുടരുമെന്ന് വ്യക്തമാക്കിയത്. തന്റെ ഫുട്ബോൾ കരിയറിന്റെ അവസാനം വരെ താൻ റയൽ മാഡ്രിഡിൽ ഉണ്ടാവുമെന്നും മാഴ്സെലോ പറഞ്ഞു.
തനിക്ക് റയൽ മാഡ്രിഡിൽ ഒരുപാടു വർഷത്തെ കരാർ ബാക്കിയുണ്ടെന്നും റയൽ മാഡ്രിഡ് ലോകത്തിലെ മികച്ച ക്ലബ് ആണെന്നും താൻ എപ്പോഴും ലോകത്തിലെ മികച്ച ക്ലബ്ബിൽ കളിക്കാനാണ് ആഗ്രഹിച്ചതെന്നും മാഴ്സെലോ വ്യക്തമാക്കി. താൻ റയൽ മാഡ്രിഡിൽ കളിക്കാൻ തുടങ്ങിയത് മുതൽ താൻ ക്ലബ് വിടുന്നതിനെ കുറിച്ചുള്ള വാർത്തകൾ വരുന്നുണ്ടെന്നും എന്നാൽ താനിക്ക് റയൽ മാഡ്രിഡിൽ നിൽക്കണമെന്നുള്ളത് മറ്റുള്ളവരെ മനസ്സിലാക്കിപ്പിക്കാൻ ബുദ്ധിമുട്ടാണെന്നും താരം പറഞ്ഞു.
ക്രിസ്റ്റ്യാനോ റൊണാൾഡോ റയൽ മാഡ്രിഡ് വിട്ട് യുവന്റസിലേക്ക് പോയതോടെയാണ് മാഴ്സെലോയും റൊണാൾഡോയുടെ വഴി തിരഞ്ഞെടുക്കമെന്ന് പറഞ്ഞ് റിപ്പോർട്ടുകൾ പുറത്തുവന്നത്.