ബ്രസീൽ താരം നെയ്മറിനെതിരെയുള്ള കഠിനമായ ഫൗളുകളിൽ നിന്ന് താരത്തെ സംരക്ഷിക്കണമെന്ന് ബ്രസീൽ ഇതിഹാസം റൊണാൾഡോ. ഫൗളിന് ശേഷം നെയ്മർ നാടകീയമായി ഗ്രൗണ്ടിൽ അഭിനയിക്കുന്നു എന്ന വിമർശനത്തിന് പിന്നാലെയാണ് നെയ്മറിന് പിന്തുണയുമായി ബ്രസീൽ ഇതിഹാസം എത്തിയത്. നെയ്മറിനെതിരെയുള്ള ഇത്തരം ആരോപണങ്ങൾ അസംബന്ധം ആണെന്നും റൊണാൾഡോ പറഞ്ഞു.
നെയ്മർ മികച്ച കഴിവുള്ള താരമാണെന്നും അതുകൊണ്ടു തന്നെ താരത്തെ സംരക്ഷിക്കണമെന്നുമാണ് റൊണാൾഡോ ആവശ്യപ്പെട്ടത്. താൻ കളിക്കാരൻ ആയിരുന്ന സമയത്തും ഇതുപോലെയുള്ള കഠിനമായ ഫൗളുകൾക്ക് വിധേയനായിട്ടുണ്ടെന്നും റൊണാൾഡോ പറഞ്ഞു. ബ്രസീലിനു വേണ്ടി നെയ്മർ മികച്ച പ്രകടനം കാഴ്ചവെക്കുന്നുണ്ടെന്നും താരം പറഞ്ഞു.
റൊണാൾഡോയും മെസ്സിയും അടക്കി വാഴുന്ന ലോകത്ത് നെയ്മറിന് അവരെ മറികടക്കാനാവുമോ എന്ന ചോദ്യത്തിന് ലോകകപ്പ് നേടിയാൽ നെയ്മറിന് അവരുടെ അടുത്ത് എത്താനാവുമെന്ന് റൊണാൾഡോ മറുപടി പറഞ്ഞു. ബ്രസീൽ ലോകകപ്പ് വിജയിക്കുയാണെങ്കിൽ നെയ്മർ റൊണാൾഡോ – മെസ്സി ആധിപത്യം അവസാനിപ്പിക്കുമെന്നും മുൻ ലോകകപ്പ് ജേതാവ് പറഞ്ഞു.
കൂടുതൽ കായിക വാർത്തകൾക്ക് : www.facebook.com/FanportOfficial
