വിജയ് ഹസാരെ ട്രോഫിയിലെ ആവേശപ്പോരാട്ടത്തിൽ ജാർഖണ്ഡിനെ എട്ട് വിക്കറ്റിന് തകർത്ത് മിന്നും വിജയം സ്വന്തമാക്കി കേരളം. ജാർഖണ്ഡ് ഉയർത്തിയ 312 റൺസ് എന്ന റൺമല, ഓപ്പണർമാരായ രോഹൻ കുന്നുമ്മലിന്റെയും സഞ്ജു സാംസണിന്റെയും ഇരട്ട സെഞ്ച്വറി കൂട്ടുകെട്ടിന്റെ (212 റൺസ്) കരുത്തിൽ കേരളം നിഷ്പ്രയാസം കീഴടക്കി.
ആദ്യ വിക്കറ്റിൽ രോഹനും സഞ്ജുവും ചേർന്ന് നടത്തിയ പടയോട്ടമാണ് കേരളത്തിന്റെ വിജയം ഉറപ്പിച്ചത്. ക്യാപ്റ്റൻ രോഹൻ കുന്നുമ്മൽ വെറും 78 പന്തിൽ നിന്ന് 11 സിക്സറുകളും 8 ഫോറുകളുമടക്കം 124 റൺസ് വാരിക്കൂട്ടി. തിരിച്ചുവരവ് മത്സരത്തിൽ 95 പന്തിൽ നിന്ന് 9 ഫോറും 3 സിക്സും സഹിതം 101 റൺസാണ് സഞ്ജു നേടിയത്. ഇരുവരും പുറത്തായ ശേഷമെത്തിയ ബാബ അപരാജിതും (41*) വിഷ്ണു വിനോദും (40*) ചേർന്ന് കൂടുതൽ വിക്കറ്റുകൾ നഷ്ടപ്പെടുത്താതെ കേരളത്തെ വിജയതീരത്തെത്തിച്ചു.
നേരത്തെ ടോസ് നേടി ബാറ്റിംഗ് തിരഞ്ഞെടുത്ത ജാർഖണ്ഡ്, കുമാർ കുശാഗ്രയുടെ തകർപ്പൻ സെഞ്ച്വറി മികവിലാണ് (143* റൺസ്) കൂറ്റൻ സ്കോർ പടുത്തുയർത്തിയത്. ഒരു ഘട്ടത്തിൽ 111-ന് 4 എന്ന നിലയിൽ തകർന്ന ജാർഖണ്ഡിനെ കുശാഗ്രയും അനുകൂൽ റോയിയും (72) ചേർന്നാണ് 311 റൺസിലേക്ക് എത്തിച്ചത്. കേരളത്തിന് വേണ്ടി നിധീഷ് എം.ഡി 4 വിക്കറ്റുകൾ വീഴ്ത്തി ബോളിങ്ങിൽ മികച്ച പ്രകടനം പുറത്തെടുത്തിരുന്നു.
