ഇന്ന് നടന്ന മിലാൻ ഡർബി ഇന്റർ മിലാൻ സ്വന്തമാക്കി. തീർത്തും ഇന്ററിന്റെ ആധിപത്യം കണ്ട മത്സരത്തിൽ ഒന്നിനെതിരെ അഞ്ചു ഗോളുകളുടെ വിജയമാണ് സ്വന്തമാക്കിയത്. അഞ്ചാം മിനുട്ടിൽ മിഖിതാര്യൻ ആണ് ഇന്ററിന്റെ ഗോൾ വേട്ട തുടങ്ങിയത്. ആദ്യ പകുതി അവസാനിക്കും മുമ്പ് തുറാം കൂടെ ഇന്ററിനായി ഗോൾ നേടി. ആദ്യ പകുതി 2-0ന്റെ ലീഡിൽ ആണ് ഇന്റർ മിലാൻ അവസാനിപ്പിച്ചത്.
രണ്ടാം പകുതിയിൽ റാഫേൽ ലിയോയിലൂടെ ഒരു ഗോൾ മടക്കി എ സി മിലാൻ സ്കോർ 2-1 എന്നാക്കി. ഇതൊരു തിരിച്ചുവരവ് ആകും എന്ന് എ സി മിലാൻ ആരാധകർ പ്രതീക്ഷിച്ചു എങ്കിലും പിന്നെ കണ്ടത് ഇന്ററിന്റെ വിളയാട്ട് ആയിരുന്നു. 69ആം മിനുട്ടിൽ ലൗട്ടാരോ മാർട്ടിനസിന്റെ പാസിൽ നിന്ന് മിഖിതാര്യൻ വീണ്ടും ഇന്ററിനായി ഗോൾ നേടി. സ്കോർ 3-1.
പിന്നെ ചഹനൊഗ്ലുവും ഫ്രറ്റെസിയും കൂടെ ഗോൾ നേടിയതോടെ ഇന്ററിന്റെ വിജയം പൂർത്തിയായി. ജയത്തോടെ നാലിൽ നാലു വിജയവുമായി 12 പോയിന്റുമായി ഇന്റർ മിലാൻ ലീഗിൽ ഒന്നാമത് നിൽക്കുകയാണ്. 9 പോയിന്റുള്ള എ സി മിലാൻ മൂന്നാം സ്ഥാനത്തും നിൽക്കുന്നു.