ത്രിരാഷ്ട്ര പരമ്പരയിലെ അഞ്ചാം മത്സരത്തില്‍ ശക്തരായ ബംഗ്ലാദേശിനെതിരെ മികച്ച ബൗളിംഗ് പ്രകടനവുമായി സിംബാബ്വേ. ടോസ് നേടി ആദ്യ ബാറ്റിംഗ് തിരഞ്ഞെടുത്ത ബംഗ്ലാദേശിനു 50 ഓവറില്‍ 9 വിക്കറ്റ് നഷ്ടത്തില്‍ 216 റണ്‍സ് മാത്രമേ നേടാനായുള്ളു. ഒരു ഘട്ടത്തില്‍ 147/2 എന്ന നിലയില്‍ നിന്നാണ് ബംഗ്ലാദേശിനെ പിടിച്ച് കെട്ടാന്‍ സിംബാബ്‍വേയ്ക്കായത്.
അനാമുള്‍ ഹക്കിനെ(1) അതിവേഗം നഷ്ടമായ ബംഗ്ലാദേശിനു തമീം ഇക്ബാല്‍(76)-ഷാകിബ് അല്‍ ഹസന്‍(51) കൂട്ടുകെട്ട് 106 റണ്‍സ് രണ്ടാം വിക്കറ്റില്‍ നേടുകയായിരുന്നു. എന്നാല്‍ പിന്നീട് വിക്കറ്റുകള്‍ വീഴ്ത്തി ബംഗ്ലാദേശിനെ സമ്മര്‍ദ്ദത്തിലാക്കുവാന്‍ സിംബാബ്‍വേയ്ക്ക് ആയി. വാലറ്റത്തില്‍ നിന്നുള്ള ചെറുത്ത് നില്പാണ് ടീം സ്കോര്‍ 200 കടക്കാന്‍ സഹായിച്ചത്. സുനമുല്‍ ഇസ്ലാം(19), മുസ്തഫിസുര്‍ റഹ്മാന്‍(18*), മുഷ്ഫികുര്‍ റഹീം(18) എന്നിവരാണ് രണ്ടക്കം കടന്ന മറ്റു താരങ്ങള്‍.
സിംബാബ്വേ നിരയില്‍ നായകന്‍ ഗ്രെയിം ക്രെമര്‍ നാലും കൈല്‍ ജാര്‍വിസ് മൂന്നും വിക്കറ്റ് നേടി.
കൂടുതൽ കായിക വാർത്തകൾക്ക് : www.facebook.com/FanportOfficial
