പുറത്താക്കാൻ ഏറ്റവും എളുപ്പമുള്ള ഇന്ത്യൻ ബാറ്റ്സ്മാൻ മുൻ ഓപ്പണർ വീരേന്ദർ സെവാഗാണെന്ന് മുൻ പാകിസ്ഥാൻ പേസർ റാണ നവേദ് ഉൾ ഹസൻ പറഞ്ഞു. “സെവാഗിനെ പുറത്താക്കാനായിരുന്നു ഏറ്റവും എളുപ്പം, ഏറ്റവും പ്രയാസം ദ്രാവിഡായിരുന്നു,” നവേദ് ഉൾ ഹസൻ ഒരു പോഡ്കാസ്റ്റിൽ പറഞ്ഞു.
2004/05 ലെ ഇന്ത്യ-പാകിസ്ഥാൻ മത്സരത്തിനിടെ സെവാഗിനെ പുറത്താക്കാൻ ചില തന്ത്രങ്ങൾ ഉപയോഗിച്ചതിന്റെ ഒരു ഉദാഹരണവും അദ്ദേഹം പങ്കുവെച്ചു.
“ഞാൻ ഒരു സംഭവം പറയാം. സെവാഗ് കളിക്കുന്ന ഒരു മത്സരം ഉണ്ടായിരുന്നു. ഇന്ത്യയിൽ പോയി ഞങ്ങൾ വിജയിച്ച 2004-05 പരമ്പരയെക്കുറിച്ചാണ് ഞാൻ സംസാരിക്കുന്നത്. ഞാൻ ടൂർണമെന്റിലെ ഏറ്റവും മികച്ച കളിക്കാരനായിരുന്നു. പരമ്പരയിൽ ഞങ്ങൾ 2-0ന് പിന്നിലായിരുന്നു. മികച്ച അഞ്ച് പരമ്പരയായിരുന്നു അത്. പരമ്പരയിലെ മൂന്നാം മത്സരത്തിൽ സെവാഗ് തകർപ്പൻ പ്രകടനമാണ് നടത്തിയത്. അവർ ഏകദേശം 300 റൺസ് സ്കോർ ചെയ്തു, സെവാഗ് 85-നോട് അടുത്തു നൽക്കുക ആയിരുന്നു.” അദ്ദേഹം തുടർന്നു.
“ഞാൻ ഇൻസി ഭായിയോട് പന്ത് തരാൻ ആവശ്യപ്പെട്ടു. ഞാൻ ഒരു സ്ലോ ബൗൺസർ എറിഞ്ഞു,” നവേദ്-ഉൽ-ഹസൻ പറഞ്ഞു.
“ഞാൻ സെവാഗിന്റെ അടുത്ത് ചെന്ന് പറഞ്ഞു ‘നിനക്ക് കളിക്കാൻ അറിയില്ല. നിങ്ങൾ പാകിസ്ഥാനിൽ ആയുരുന്നു എങ്കിൽ, നിങ്ങൾ അന്താരാഷ്ട്ര ടീമിൽ ഇടം നേടുമെന്ന് പോലുൻ ഞാൻ കരുതുന്നില്ല, ”അദ്ദേഹം കൂട്ടിച്ചേർത്തു
“അവൻ എന്നോട് കുറച്ച് കാര്യങ്ങൾ തിരിച്ചു പറഞ്ഞു. തിരിച്ചുപോകുമ്പോൾ ഞാൻ ഇൻസി ഭായിയോട് പറഞ്ഞു, ‘അടുത്ത പന്ത്, അവൻ ഔട്ട് ആണ്’. ക്യാപ്റ്റൻ ആശ്ചര്യപ്പെട്ടു. ഞാൻ ബാക്ക്-ഓഫ്-ദി-ഹാൻഡ് സ്ലോ ബോൾ എറിഞ്ഞു, പ്രകോപിതനായ സെവാഗ് അത് അടിക്കാൻ ശ്രമിച്ചു, പക്ഷേ പുറത്തായി. വിക്കറ്റ് വളരെ പ്രധാനമായിരുന്നു, ആ മത്സരം ഞങ്ങൾ ജയിച്ചു.” അദ്ദേഹം കൂട്ടിച്ചേർത്തു.