വിരാട് കോഹ്ലിയില് നിന്ന് ടെസ്റ്റ് റാങ്കിംഗിലെ ബാറ്റ്സ്മാന്മാരുടെ ഒന്നാം റാങ്ക് തിരിച്ച് പിടിച്ച് സ്റ്റീവന് സ്മിത്ത്. ആഷസിലെ തന്റെ മൂന്ന് ഇന്നിംഗ്സുകളിലെ മിന്നും പ്രകടനത്തിന്റെ ബലത്തിലാണ് സ്റ്റീവ് സ്മിത്ത് ഒന്നാം റാങ്ക് പിടിച്ചെടുത്തത്. 144, 142, 92 എന്നിങ്ങനെയായിരുന്നു സ്മിത്തിന്റെ സ്കോറുകള്. ലോര്ഡ്സില് 92 റണ്സ് നേടി പുറത്തായ സ്മിത്ത് കണ്ക്ഷന് കാരണം രണ്ടാം ഇന്നിംഗ്സിലും ലീഡ്സ് ടെസ്റ്റിലും കളിച്ചിരുന്നില്ല.
ജമൈക്കയില് രണ്ടാം ഇന്നിംഗ്സില് വിരാട് കോഹ്ലി പൂജ്യത്തിന് പുറത്തായതാണ് താരത്തിന് ഒന്നാം റാങ്ക് നഷ്ടമാകുവാന് കാരണമായത്. ഇരു താരങ്ങളും തമ്മിലുള്ള പോയിന്റുകളുടെ വ്യത്യാസം ഒരു പോയിന്റാണ്. സ്റ്റീവ് സ്മിത്തിന് 904 പോയിന്റുള്ളപ്പോള് വിരാട് കോഹ്ലിയ്ക്ക് 903 പോയിന്റിന്റാണുള്ളത്. ആഷസിലെ അവശേഷിക്കുന്ന ടെസ്റ്റുകളില് കൂടുതല് മികവ് പുലര്ത്തിയാല് സ്മിത്തിന് തന്റെ ലീഡ് ഉയര്ത്താനാകും.