റോഡ് സേഫ്റ്റി ലെജൻഡ്സ് ക്രിക്കറ്റ് ലീഗിൽ ശ്രീലങ്കയ്ക്ക് വിജയം. ഈ ടൂർണമെന്റിലെ ആദ്യ സെഞ്ച്വറി സ്വന്തമാക്കിയ ദിൽഷന്റെ പ്രകടനമാണ് ശ്രീലങ്കയ്ക്ക് ഓസ്ട്രേലിയക്ക് എതിരെ 38 റൺസിന്റെ ജയം നൽകിയത്. ഇന്ന് ആദ്യം ബാറ്റു ചെയ്ത് ശ്രീലങ്ക 20 ഓവറിൽ ഒരു വിക്കറ്റ് മാത്രം നഷ്ടത്തിൽ 218 റൺസ് എടുത്തു. ഓപ്പണിങ് വിക്കറ്റിൽ തന്നെ 208 റൺസ് ആണ് ശ്രീലങ്ക എടുത്തത്.
ഓപ്പണർ ആയി ഇറങ്ങിയ ദിൽഷൻ 56 പന്തിൽ 107 റൺസ് എടുത്തു. 14 ഫോറും നാലു സിക്സും അടങ്ങിയതായിരുന്നു ദിൽഷന്റെ ഇന്നിങ്സിൽ. 63 പന്തിൽ 95 റൺസ് എടുത്ത് മുനവീര പുറത്താകാതെ നിന്നു.
രണ്ടാമത് ബാറ്റു ചെയ്ത ഓസ്ട്രേലിയക്ക് 180 റൺസ് എടുക്കാനെ ആയുള്ളൂ. വാട്സൺ 23 പന്തിൽ 39 റൺസ് എടുത്തു. ശ്രീലങ്കയ്ക്ക് ആയി കുലസേകര നാലു വിക്കറ്റുകൾ വീഴ്ത്തി.