ന്യൂസിലൻഡ് പരമ്പരയ്ക്കുള്ള ഇന്ത്യൻ ഏകദിന ടീമിനെ പ്രഖ്യാപിക്കാനിരിക്കെ, സെലെക്ടർമാരുടെ നെഞ്ചിടിപ്പ് കൂട്ടുന്നത് വിക്കറ്റ് കീപ്പർ ബാറ്റർ ഋഷഭ് പന്തിന്റെ ഫോമില്ലായ്മയാണ്. ടെസ്റ്റ് ക്രിക്കറ്റിലെ ഹീറോയാണെങ്കിലും വൈറ്റ് ബോൾ ക്രിക്കറ്റിലേക്ക് വരുമ്പോൾ പന്ത് ഇപ്പോഴും താളം കണ്ടെത്താൻ കഷ്ടപ്പെടുകയാണ്.
തന്റെ ഫോം തെളിയിക്കാൻ ആഭ്യന്തര ക്രിക്കറ്റിലേക്ക് മടങ്ങിയ പന്തിന് അവിടെയും വലിയ ചലനമുണ്ടാക്കാൻ കഴിഞ്ഞിട്ടില്ല. വിജയ് ഹസാരെ ട്രോഫിയിൽ ഡൽഹിക്ക് വേണ്ടി കളിച്ച പന്തിന്റെ സ്കോറുകൾ പരിശോധിച്ചാൽ (5, 70, 22, 24) വലിയൊരു നിരാശയാണ് കാണാൻ കഴിയുന്നത്. ഗുജറാത്തിനെതിരെ നേടിയ ആ ഒറ്റ അർദ്ധ സെഞ്ച്വറി മാറ്റിനിർത്തിയാൽ ബാക്കി ഇന്നിംഗ്സുകളിലെല്ലാം ക്രീസിൽ സെറ്റായ ശേഷം വിക്കറ്റ് വലിച്ചെറിയുന്ന പഴയ രീതി തന്നെയാണ് പന്ത് തുടരുന്നത്.
പന്തിന്റെ ഈ മങ്ങിയ പ്രകടനം ഏറ്റവും കൂടുതൽ സഹായകമാകുന്നത് ഇഷാൻ കിഷനാണ്. ടി20-യിലും ഏകദിനത്തിലും മികച്ച സ്ട്രൈക്ക് റേറ്റിൽ ബാറ്റ് വീശുന്ന ഇഷാനെ ടീമിൽ ഉൾപ്പെടുത്തണമെന്ന ആവശ്യം സോഷ്യൽ മീഡിയയിൽ ഇതിനോടകം ശക്തമാണ്. സ്ട്രൈക്ക് റൊട്ടേറ്റ് ചെയ്യാനും അവസാന ഓവറുകളിൽ തകർത്തടിക്കാനും നിലവിൽ ഇഷാൻ കാണിക്കുന്ന മികവ് പന്തിന് വലിയ ഭീഷണിയാണ്.
ഇനി വരാനിരിക്കുന്ന ന്യൂസിലൻഡ് പരമ്പര പന്തിന്റെ ഏകദിന കരിയറിലെ തന്നെ ഏറ്റവും വലിയ പരീക്ഷണമായിരിക്കും. ഇനിയും പന്തിന്റെ പ്രതിഭയെ മാത്രം വിശ്വസിച്ച് സെലക്ടർമാർ മുന്നോട്ട് പോകുമോ, അതോ ഫോമിന് മുൻഗണന നൽകി പുതിയ താരങ്ങളെ പരീക്ഷിക്കുമോ എന്നാണ് അറിയേണ്ടത്. ഈ പരമ്പരയിൽ പന്ത് പുറത്താക്കപ്പെട്ടാൽ, പഴയ പ്രതാപം തിരിച്ചുപിടിക്കാൻ അദ്ദേഹത്തിന് ഐപിഎല്ലിലും ആഭ്യന്തര മത്സരങ്ങളിലും കഠിനാധ്വാനം ചെയ്യേണ്ടി വരും.
