ലഖ്നൗ സൂപ്പർ ജയന്റ്സ് (എൽഎസ്ജി) ഇന്ന് നിർണായകമായ മത്സരത്തിൽ മുംബൈ ഇന്ത്യൻസിനെതിരെ (എംഐ) ഇറങ്ങുമ്പോൾ ഫാസ്റ്റ് ബൗളർ മായങ്ക് യാദവ് ടീമിൽ ഉണ്ടാകും. മായങ്ക് യാദവ് 2024 ഒക്ടോബറിൽ ബംഗ്ലാദേശിനെതിരായ ടി20 പരമ്പരയ്ക്ക് ശേഷം ക്രിക്കറ്റ് കളിച്ചിട്ടില്ല.
യുവ പേസർ രാജസ്ഥാൻ റോയൽസിനെതിരായ മത്സരത്തിന് മുന്നോടിയായി എൽഎസ്ജി ടീമിനൊപ്പം വീണ്ടും ചേർന്നിരുന്നു. ഡൽഹി ക്യാപിറ്റൽസിനെതിരായ കഴിഞ്ഞ മത്സരത്തിൽ ഇംപാക്ട് പ്ലെയർ ഓപ്ഷനുകളിൽ അദ്ദേഹത്തെ ഉൾപ്പെടുത്തിയിരുന്നെങ്കിലും എൽഎസ്ജി പകരം ആയുഷ് ബദോനിക്കാണ് അവസരം നൽകിയത്.
കഴിഞ്ഞ സീസണിൽ അതിവേഗ പന്തുകളിലൂടെ (156.7 kmph വരെ) മായങ്ക് യാദവ് ശ്രദ്ധേയനായിരുന്നു. പഞ്ചാബ് കിംഗ്സിനും റോയൽ ചാലഞ്ചേഴ്സ് ബാംഗ്ലൂരിനുമെതിരെ തുടർച്ചയായി പ്ലെയർ ഓഫ് ദി മാച്ച് പുരസ്കാരങ്ങൾ നേടി. എന്നിരുന്നാലും, പരിക്ക് കാരണം മൂന്ന് മത്സരങ്ങൾ മാത്രമെ കളിക്കാൻ ആയുള്ളൂ.