ഈ സീസണിൽ റയൽ മാഡ്രിഡിനെതിരെ തങ്ങളുടെ ആധിപത്യം ഒരിക്കൽ കൂടി ഉറപ്പിച്ച് ബാഴ്സലോണ, അധിക സമയത്തേക്ക് നീണ്ട ആവേശകരമായ പോരാട്ടത്തിൽ 3-2 ന് വിജയിച്ച് കോപ്പ ഡെൽ റേ കിരീടം ചൂടി. ഈ വിജയത്തോടെ ഈ സീസണിൽ മൂന്നാം തവണയാണ് ബാഴ്സ തങ്ങളുടെ ചിരവൈരികളെ തോൽപ്പിക്കുന്നത്.
ഫൈനലിന് ശേഷം സംസാരിച്ച ബാഴ്സലോണയുടെ യുവ താരം ലമിൻ യമാൽ ടീമിൽ നിറഞ്ഞുനിൽക്കുന്ന ആത്മവിശ്വാസവും പോരാട്ടവീര്യവും പങ്കുവെച്ചു. “ഞങ്ങൾ ഒരു ഗോൾ വഴങ്ങിയാലും പ്രശ്നമില്ല. ഞങ്ങൾ രണ്ട് ഗോളുകൾ വഴങ്ങിയാലും പ്രശ്നമില്ല. റയലിന് ഞങ്ങളെ തോൽപ്പിക്കാൻ ആകില്ല,” യമാൽ പറഞ്ഞു.
“ഈ വർഷം അവർക്ക് ഞങ്ങളെ തോൽപ്പിക്കാൻ കഴിയില്ല. ഞങ്ങൾ അത് തെളിയിച്ചു. എനിക്ക് വളരെ സന്തോഷമുണ്ട്.!” അദ്ദേഹം പറഞ്ഞു. ലാലിഗയിൽ ഒരു എൽ ക്ലാസികോ കൂടെ ബാക്കിയിരിക്കെ ഇന്നലത്തെ പരാജയം റയൽ മാഡ്രിഡിനു മേൽ സമ്മർദ്ദം ഉയർത്തിയിരിക്കുകയാണ്.