ഇന്ത്യൻ പ്രീമിയർ ലീഗിലെ (IPL) ചാമ്പ്യന്മാർ ആരാണെന്ന് ഇന്നറിയാം. ഇന്ന് ഐപിഎൽ ഫൈനലിൽ കൊൽക്കത്ത നൈറ്റ് റൈഡേഴ്സ് സൺറൈസേഴ്സ് ഹൈദരാബാദിനെ നേരിടും. ഇന്ന് ചെന്നൈയിലെ ചെപോക് സ്റ്റേഡിയത്തിൽ വച്ചാണ് മത്സരം നടക്കുന്നത്. ക്വാളിഫയർ ഒന്നിൽ ഇരുവരും ഏറ്റുമുട്ടിയപ്പോൾ ഏകപക്ഷീയമായ വിജയം കൊൽക്കത്ത നൈറ്റ് റൈഡേഴ്സിന് നേടാനായിരുന്നു. എന്നാൽ അത് അന്ന് അഹമ്മദാബാദിൽ ആയിരുന്നു മത്സരം. ഇന്ന് സ്പിന്നിനെ തുണക്കുന്ന സ്ലോ പിച്ചുള്ള ചെന്നൈയിലാണ് മത്സരം നടക്കുന്നത്.
ചെന്നൈയിൽ തന്നെ നടന്ന ക്വാളിഫയർ രണ്ടിൽ രാജസ്ഥാൻ റോയൽസിനെ പരാജയപ്പെടുത്തിയാണ് സൺറൈസേഴ്സ് ഹൈദരാബാദ് ഫൈനലിൽ എത്തിയത്. അന്ന് അവർ ബാറ്റു കൊണ്ടും ബോളും കൊണ്ടും ഗംഭീര പ്രകടനമാണ് കാഴ്ചവച്ചത്. ചെന്നൈയിൽ രണ്ടു ദിവസങ്ങൾക്കു മുന്നേ കളിച്ചു എന്നത് ഹൈദരാബാദിന് ചെറിയ ആത്മവിശ്വാസം നൽകും.
ഇന്ന് രാത്രി 7.30ന് നടക്കുന്ന മത്സരം തത്സമയം സ്റ്റാർ സ്പോർട്സിലും ജിയോ സിനിമയിലും കാണം.