കേരള പ്രീമിയർ ലീഗിൽ ഇന്ന് കേരള ബ്ലാസ്റ്റേഴ്സിന് പരാജയം. കോട്ടപ്പടി മൈതാനത്ത് നടന്ന മത്സരത്തിൽ കോവളം എഫ് സിയാണ് കേരള ബ്ലാസ്റ്റേഴ്സ് റിസേർവ്സ് ടീമിനെ പരാജയപ്പെടുത്തിയത്. ഒന്നിനെതിരെ മൂന്നു ഗോളുകൾക്കായിരുന്നു കോവളം എഫ് സിയുടെ വിജയം. പതിമൂന്നാം മിനിറ്റിൽ ഒരു പെനാൽറ്റിയിലൂടെയാണ് കോവളം ലീഡ് എടുത്തത്. അബിൻ ആണ് പെനാൽറ്റി ലക്ഷ്യത്തിലെത്തിച്ചത്.
രണ്ടാം പകുതിയിൽ വൈഷ്ണവ് കോവളത്തിനായി ഇരട്ട ഗോളുകളും നേടി. 68ആം മിനിട്ടിലും 88ആം മിനിട്ടിലും ആയിരുന്നു വൈഷ്ണവിന്റെ ഗോളുകൾ. വൈഷ്ണവ് കളിയിലെ താരമായി തിരഞ്ഞെടുക്കപ്പെട്ടു. കേരള ബ്ലാസ്റ്റേഴ്സിനായി അമൻ ആശ്വാസ ഗോൾ നേടി.