ടൊറന്റോ എഫ്.സിയുമായുള്ള മൂന്നുവർഷത്തെ മേജർ ലീഗ് സോക്കർ ബന്ധം അവസാനിപ്പിച്ച് ഫെഡറിക്കോ ബെർണാർഡെസ്കി ഇറ്റലിയിലേക്ക് മടങ്ങിയെത്തുന്നു. ടൊറന്റോ എഫ്.സിയുമായി കരാർ റദ്ദാക്കിയതിന് പിന്നാലെ, ബൊളോണയിൽ ചേരാൻ ബെർണാർഡെസ്കി ധാരണയിലെത്തിയതായി ഇറ്റലിയിൽ നിന്ന് നിരവധി റിപ്പോർട്ടുകൾ സൂചിപ്പിക്കുന്നു.
സീരി എ ക്ലബ്ബായ ബൊളോണയുമായി ബെർണാർഡെസ്കി രണ്ട് വർഷത്തെ കരാറിൽ ഒപ്പുവെക്കുമെന്നാണ് പ്രതീക്ഷിക്കുന്നത്. ഇത് ഒരു വർഷത്തേക്ക് കൂടി നീട്ടാനുള്ള വ്യവസ്ഥയുമുണ്ട്, ഇത് അദ്ദേഹത്തെ 2028 വേനൽക്കാലം വരെ ക്ലബ്ബിൽ നിലനിർത്തിയേക്കാം. 31 വയസ്സുകാരനായ ബെർണാർഡെസ്കി ബൊളോണയിലെ അരങ്ങേറ്റ സീസണിൽ പത്താം നമ്പർ ജേഴ്സി അണിയുമെന്നും പ്രതിവർഷം ഏകദേശം 1.8 ദശലക്ഷം യൂറോ വരുമാനം നേടുമെന്നും റിപ്പോർട്ടുകൾ പറയുന്നു.
എം.എൽ.എസിലേക്ക് പോകുന്നതിന് മുൻപ് ബെർണാർഡെസ്കി യുവന്റസിനായി 183 മത്സരങ്ങളും ഫിയോറെന്റിനക്കായി 93 മത്സരങ്ങളും കളിച്ചിട്ടുണ്ട്. ഇറ്റാലിയൻ ദേശീയ ടീമിനായി 39 മത്സരങ്ങളിലും അദ്ദേഹം ബൂട്ടണിഞ്ഞിട്ടുണ്ട്.