തമീം ഇഖ്ബാൽ ബംഗ്ലാദേശിന്റെ ഏകദിന അന്താരാഷ്ട്ര ടീമിന്റെ ക്യാപ്റ്റൻ സ്ഥാനം ഒഴിഞ്ഞു. ഓഗസ്റ്റ്, സെപ്തംബർ മാസങ്ങളിൽ പാക്കിസ്ഥാനിലും ശ്രീലങ്കയിലും നടക്കാനിരിക്കുന്ന ഏഷ്യാ കപ്പിൽ നിന്ന് പിന്മാറുന്നതായും താരം അറിയിച്ചു. 34-കാരനായ താരം അടുത്തിടെ ആയിരുന്നു അന്താരാഷ്ട്ര ക്രിക്കറ്റിൽ നിന്ന് വിരമിച്ച് യു-ടേൺ എടുത്ത് തിരികെ ടീമിലേക്ക് എത്തിയത്. പരിക്ക് കാരണമാണ് താൻ ക്യാപ്റ്റൻ സ്ഥാനം ഒഴിയുന്നത് എന്ന് തമീം പറഞ്ഞു.
“ഞാൻ ബംഗ്ലാദേശ് ഏകദിന ടീം ക്യാപ്റ്റൻ സ്ഥാനം ഒഴിയുകയാണെന്ന് ഞാൻ ബിസിബി ഉദ്യോഗസ്ഥരെ അറിയിച്ചിട്ടുണ്ട്. കാരണം ഞാൻ വിശദീകരിച്ചിട്ടുണ്ട്. പരിക്ക് പ്രശ്നമാണ്,” തമീം മാധ്യമപ്രവർത്തകരോട് പറഞ്ഞു.
“ഞാൻ എപ്പോഴും ടീമിനെക്കുറിച്ചാണ് ആദ്യം ചിന്തിച്ചത്. ടീമിന്റെ പുരോഗതിക്കായാണ് ഈ തീരുമാനം. ഞാൻ ക്യാപ്റ്റൻ സ്ഥാനം ഒഴിയുകയും ഒരു കളിക്കാരനെന്ന നിലയിൽ ശ്രദ്ധ കേന്ദ്രീകരിക്കുകയും അവസരം വരുമ്പോഴെല്ലാം എന്റെ മികച്ചത് നൽകാൻ ശ്രമിക്കുകയും ചെയ്യും.” തമീം പറഞ്ഞു.