ശ്രേയസ് അയ്യർ അദ്ദേഹത്തിന്റെ മോശം ഫോം തുടരുന്നു. ഇന്ന് അനന്തപുരിലെ റൂറൽ ഡെവലപ്മെൻ്റ് ട്രസ്റ്റ് സ്റ്റേഡിയത്തിൽ ഇന്ത്യ ബിക്കെതിരായ ഇന്ത്യ ഡിയുടെ മൂന്നാം റൗണ്ട് ദുലീപ് ട്രോഫി മത്സരത്തിലും ശ്രേയസ് ബാറ്റു കൊണ്ട് പരാജയപ്പെട്ടു. ടൂർണമെൻ്റിലെ തൻ്റെ രണ്ടാം ഡക്ക് താരം ഇന്ന് റജിസ്റ്റർ ചെയ്തു. 49-ാം ഓവറിൽ രാഹുൽ ചാഹറിന്റെ പന്തിൽ പുറത്തായ ശ്രേയസ് 5 പന്തിൽ ഒരു റൺ പോലും എടുത്തില്ല.
ദേവദത്ത് പടിക്കൽ, ശ്രീകർ ഭരത് എന്നിവരുടെ 105 റൺസിൻ്റെ ശക്തമായ ഓപ്പണിംഗ് കൂട്ടുകെട്ട് ഉണ്ടായിരുന്നിട്ടും, സ്ഥിരതയില്ലാത്ത ഫോം തുടരുന്ന അയ്യർ ആ തുടക്കം മുതലാക്കുന്നതിൽ പരാജയപ്പെട്ടു. അഞ്ച് ഇന്നിംഗ്സുകളിൽ നിന്ന് 20.80 ശരാശരിയിൽ 104 റൺസ് മാത്രമാണ് അയ്യർക്ക് ദുലീപ് ട്രോഫിയിൽ നേടാനായത്.