സയ്യിദ് മുഷ്താഖ് അലി ട്രോഫി എലൈറ്റ് ഗ്രൂപ്പ് ടി20 മത്സരത്തിൽ കേരളത്തിനെതിരെ ഛത്തീസ്ഗഢ് 19.5 ഓവറിൽ 120 റൺസിന് ഓൾ ഔട്ടായി. ലഖ്നൗവിലെ ഭാരത് രത്ന ശ്രീ അടൽ ബിഹാരി വാജ്പേയി ഏകാന ക്രിക്കറ്റ് സ്റ്റേഡിയത്തിൽ നടന്ന മത്സരത്തിൽ ടോസ് നേടിയ കേരളം ഫീൽഡിംഗ് തിരഞ്ഞെടുക്കുകയായിരുന്നു. കേരള ബൗളർമാർ കാഴ്ചവെച്ച അച്ചടക്കമുള്ള പ്രകടനമാണ് ഛത്തീസ്ഗഢ് ഇന്നിംഗ്സിൽ ഉടനീളം കൃത്യമായ ഇടവേളകളിൽ വിക്കറ്റുകൾ വീഴാൻ കാരണമായത്.
37 പന്തിൽ 41 റൺസ് നേടിയ അമൻദീപ് ഖരെയാണ് ഛത്തീസ്ഗഢിനായി ടോപ് സ്കോറർ ആയത്. സഞ്ജീത് ദേശായി വെറും 23 പന്തിൽ 35 റൺസ് നേടി മികച്ച പ്രകടനം കാഴ്ചവെച്ചു.
കേരള ബൗളർമാർ വിക്കറ്റുകൾ പങ്കിട്ടെടുത്തു. 16 റൺസ് മാത്രം വഴങ്ങി മൂന്ന് വിക്കറ്റുകൾ വീഴ്ത്തിയ കെ എം ആസിഫ് മികച്ച പ്രകടനം കാഴ്ചവെച്ചപ്പോൾ, അങ്കിത് ശർമ്മ, അരങ്ങേറ്റക്കാരൻ വിഗ്നേഷ് പൂത്തൂർ എന്നിവർ രണ്ട് വിക്കറ്റുകൾ വീതം നേടി. നിധീഷ്, ശറഫുദ്ദീൻ, ബാസിത് എന്നിവർ ഒരോ വിക്കറ്റ് വീതവും നേടി.