വിംബിൾഡൺ ആദ്യ ദിനത്തിൽ തന്നെ വമ്പൻ അട്ടിമറികൾ. സീസണിൽ മോശം ഫോമിലുള്ള റഷ്യൻ താരവും ഒമ്പതാം സീഡും ആയ ഡാനിൽ മെദ്വദേവ് സീഡ് ചെയ്യാത്ത ഫ്രഞ്ച് താരം ബെഞ്ചമിൻ ബോൻസിയോട് നാലു സെറ്റ് നീണ്ട മത്സരത്തിൽ തോറ്റു പുറത്തായി. 2 സെറ്റുകളിൽ ടൈബ്രേക്ക് കണ്ട മത്സരത്തിൽ 7-6, 3-6, 7-6, 6-2 എന്ന സ്കോറിന് ആണ് മുൻ ഗ്രാന്റ് സ്ലാം ജേതാവ് മത്സരം തോറ്റത്. 14 ഏസുകൾ ഉതിർത്ത താരം പക്ഷെ 12 ഇരട്ട സർവീസ് പിഴകൾ ആണ് വരുത്തിയത്.
കടുത്ത നിരാശ മത്സരത്തിന് ശേഷം താരത്തിന്റെ മുഖത്തിൽ കാണാൻ ഉണ്ടായിരുന്നു. അതേസമയം പരിക്കിൽ നിന്നു തിരിച്ചു വന്ന 24 സീഡ് ഗ്രീക്ക് താരം സ്റ്റെഫനോസ് സിറ്റിപാസും ആദ്യ റൗണ്ടിൽ പരാജയപ്പെട്ടു പുറത്തായി. സീഡ് ചെയ്യാത്ത ഫ്രഞ്ച് താരം വലന്റിൻ റോയറിനോട് 6-3, 6-2 എന്ന സ്കോറിന് പിറകിൽ നിന്ന സിറ്റിപാസ് പരിക്ക് കാരണം മത്സരത്തിൽ നിന്നു പിന്മാറുക ആയിരുന്നു.