വിംബിൾഡൺ സെമിഫൈനലിലേക്ക് മുന്നേറി സീഡ് ചെയ്യാത്ത ചെക് റിപ്പബ്ലിക് താരം മാർകെറ്റ വോണ്ടറൗസോവ. നാലാം സീഡ് അമേരിക്കൻ താരം ജെസിക്ക പെഗ്യുലയെ അട്ടിമറിച്ചു ആണ് ചെക് താരം വിംബിൾഡൺ അവസാന നാലിലേക്ക് മുന്നേറിയത്. 2019 ഫ്രഞ്ച് ഓപ്പൺ ഫൈനലിസ്റ്റും ഒളിമ്പിക് വെള്ളി മെഡൽ ജേതാവും ആയ ചെക് താരത്തിന്റെ ആദ്യ വിംബിൾഡൺ സെമിഫൈനൽ ആണ് ഇത്.
ആദ്യ സെറ്റ് 6-4 നു ചെക് താരം നേടിയപ്പോൾ 6-2 നു രണ്ടാം സെറ്റ് നേടി ജെസിക്ക തിരിച്ചടിച്ചു. മൂന്നാം സെറ്റിൽ 4-1 നു അമേരിക്കൻ താരം മുന്നിട്ട് നിൽക്കുമ്പോൾ ആണ് മഴ എത്തിയത്. തുടർന്ന് ഇടവേളക്ക് ശേഷം ഒന്നാം നമ്പർ കോർട്ടിൽ റൂഫ് അടച്ച ശേഷം തുടർച്ചയായി 5 ഗെയിമുകൾ നേടിയ ചെക് താരം സെറ്റ് 6-4 നു നേടി മത്സരം സ്വന്തം പേരിലാക്കി. തീർത്തും അപ്രതീക്ഷതമായ ജയത്തിനു ശേഷം കണ്ണീരോടെയാണ് ചെക് താരം റിസൾട്ട് സ്വീകരിച്ചത്.