19 സീഡ് ജർമ്മൻ താരം സാഷ സെരവിനെ നേരിട്ടുള്ള സെറ്റുകൾക്ക് തകർത്തു 2021 ലെ വിംബിൾഡൺ ഫൈനലിസ്റ്റ് മറ്റെയോ ബരെറ്റിനി അവസാന പതിനാറിൽ. സീഡ് ചെയ്യാതെ എത്തിയ ഇറ്റാലിയൻ താരം രണ്ടു ടൈബ്രൈക്കറുകൾ ജയിച്ചു ആണ് മത്സരം സ്വന്തമാക്കിയത്. 6-3, 7-6, 7-6 എന്ന സ്കോറിന് ആയിരുന്നു ഇറ്റാലിയൻ താരത്തിന്റെ ജയം. മത്സരത്തിൽ 12 ഏസുകൾ സാഷ ഉതിർത്തപ്പോൾ ബരെറ്റിനി 15 എണ്ണം ഉതിർത്തു.
അവസാന പതിനാറിൽ ഒന്നാം സീഡ് കാർലോസ് അൽകാരസ് ആണ് ബരെറ്റിനിയുടെ എതിരാളി. തുടർച്ചയായ 5 ദിവസം കളിച്ച ക്ഷീണം മറികടന്ന പ്രകടനം ആണ് ബരെറ്റിനി ഇന്ന് പുറത്ത് എടുത്തത്. അതേസമയം 5 സെറ്റ് നീണ്ട മാരത്തോൺ പോരാട്ടം ജയിച്ചു ആറാം സീഡ് ആയ ഡാനിഷ് താരം ഹോൾഗർ റൂണെ അവസാന പതിനാറിൽ എത്തി. 31 സീഡ് ആയ സ്പാനിഷ് താരം അൽഹാൻഡ്രോ ഡേവിഡോവിച് ഫോകിനയെ 6-3, 4-6, 3-6, 6-4, 7-6(10-8) എന്ന സ്കോറിന് ആണ് ഡാനിഷ് താരം തോൽപ്പിച്ചത്. അവസാന സെറ്റ് ടൈബ്രേക്കറിൽ 2-6, 5-8 എന്ന സ്കോറിൽ പിറകിൽ നിന്ന ശേഷമാണ് റൂണെ അവിശ്വസനീയ തിരിച്ചു വരവ് നടത്തിയത്.