വിംബിൾഡൺ അവസാന പതിനാറിലേക്ക് മുന്നേറി ലോക ഒന്നാം നമ്പർ താരം കാർലോസ് അൽകാരസ് ഗാർഫിയ. 25 സീഡും ചിലി താരവും ആയ നിക്കോ ജാറിയെ ഏതാണ്ട് നാലു മണിക്കൂർ നീണ്ട നാലു സെറ്റ് പോരാട്ടത്തിൽ ആണ് അൽകാരസ് തോൽപ്പിച്ചത്. 6-3, 6-7, 6-3, 7-5 എന്ന സ്കോറിന് ആയിരുന്നു അൽകാരസിന്റെ ജയം. മത്സരത്തിൽ 12 ഏസുകൾ ഉതിർത്ത അൽകാരസ് 5 തവണ എതിരാളിയെ ബ്രേക്ക് ചെയ്തു.
നാലാം സെറ്റിൽ 3-0 നും 15-40 നും പിറകിൽ നിന്ന ശേഷം ബ്രേക്ക് പോയിന്റ് രക്ഷിച്ചാണ് അൽകാരസ് സെറ്റ് 7-5 നു ജയിച്ചു മത്സരം സ്വന്തം പേരിലാക്കിയത്. സെർബിയൻ താരം ലാസ്ലോയെ 6-4, 7-6, 6-4 എന്ന സ്കോറിന് തകർത്ത അഞ്ചാം സീഡ് സ്റ്റെഫനോസ് സിറ്റിപാസ് അവസാന പതിനാറിലേക്ക് അനായാസം മുന്നേറി. മത്സരത്തിൽ 6 ഏസുകൾ ഉതിർത്ത സിറ്റിപാസ് 3 തവണ എതിരാളിയെ ബ്രേക്ക് ചെയ്തു. അമേരിക്കൻ താരം ക്രിസ്റ്റഫർ എബാങ്ക്സും 16 സീഡ് ടോമി പോളിനെ 5 സെറ്റ് പോരാട്ടത്തിൽ അട്ടിമറിച്ചു ചെക് താരം ജിറി ലെഹകയും അവസാന പതിനാറിലേക്ക് മുന്നേറി.