അനായാസ ജയവുമായി അൽകാരസ്, നോറി, റൂബ്ലേവ്, സിന്നർ തുടങ്ങിയവർ യു.എസ് ഓപ്പൺ മൂന്നാം റൗണ്ടിൽ

യു.എസ് ഓപ്പണിൽ അനായാസ ജയവുമായി മൂന്നാം സീഡ് സ്പാനിഷ് താരം കാർലോസ് അൽകാരസ് ഗാർഫിയ മൂന്നാം റൗണ്ടിൽ. അർജന്റീനൻ താരം ഫെഡറികോ കോറിയയെ നേരിട്ടുള്ള സെറ്റുകൾക്ക് ആണ് അൽകാരസ് തകർത്തത്. 7 തവണ എതിരാളിയുടെ സർവീസ് ബ്രൈക്ക് ചെയ്ത അൽകാരസ് 6-2, 6-1, 7-5 എന്ന സ്കോറിന് മത്സരം സ്വന്തം പേരിലാക്കി. പോർച്ചുഗീസ് താരം ജാവോ സൗസയെ നേരിട്ടുള്ള സെറ്റുകൾക്ക് ആണ് ബ്രിട്ടീഷ് താരവും ഏഴാം സീഡും ആയ കാമറൂൺ നോറി മറികടന്നത്. 6-4, 6-4, 7-6 എന്ന സ്കോറിന് ആയിരുന്നു ബ്രിട്ടീഷ് ഒന്നാം നമ്പർ താരത്തിന്റെ ജയം.

ജപ്പാൻ താരം സൂ വൂവിനെ 6-3, 6-0, 6-4 എന്ന സ്കോറിന് തകർത്ത ഒമ്പതാം സീഡ് ആന്ദ്ര റൂബ്ലേവും മൂന്നാം റൗണ്ടിൽ എത്തി. മത്സരത്തിൽ 12 ഏസുകൾ ഉതിർത്ത റൂബ്ലേവ് ആറു തവണ എതിരാളിയെ ബ്രൈക്ക് ചെയ്തു. അമേരിക്കൻ താരം ക്രിസ്റ്റഫറിനെ 6-4, 7-6, 6-2 എന്ന സ്കോറിന് മറികടന്ന 11 സീഡ് ഇറ്റാലിയൻ താരം യാനിക് സിന്നർ, സ്പാനിഷ് താരം ആൽബർട്ട് റാമോസിനെ 6-3, 7-6, 6-3 എന്ന സ്കോറിന് മറികടന്ന 15 സീഡ് മാരിൻ ചിലിച് എന്നിവരും മൂന്നാം റൗണ്ടിലേക്ക് മുന്നേറി. അമേരിക്കൻ താരം ബ്രാണ്ടൻ നകഷിമയോട് 7-6, 7-5, 6-3 എന്ന നേരിട്ടുള്ള സ്കോറിന് പരാജയപ്പെട്ട 17 സീഡ് ഗ്രിഗോർ ദിമിത്രോവ്, അമേരിക്കൻ താരം ജെൻസൻ ബ്രൂക്സ്ബിയോട് നേരിട്ടുള്ള സ്കോറിന് പരാജയപ്പെട്ട 25 സീഡ് ബോർണ ചോരിച് എന്നിവർ രണ്ടാം റൗണ്ടിൽ പുറത്തായി.