മോണ്ടി കാർലോ മാസ്റ്റേഴ്സിൽ നിന്ന് റാഫേൽ നദാൽ പിൻമാറി, വ്യാഴാഴ്ച സോഷ്യൽ മീഡിയ പോസ്റ്റിലൂടെ നദാൽ തന്നെയാണ് ടൂർണമെന്റിൽ നിന്ന് പിന്മാറുന്നതായി അറിയിച്ചത്. ഈ സീസണിലെ കളിമണ്ണിൽ ആദ്യ എടിപി മാസ്റ്റേഴ്സ് 1000 ഇവൻ്റ് ആണ് മോണ്ടി കാർലോ മാസ്റ്റേഴ്സ്. ഏപ്രിൽ 7 മുതൽ 14 വരെ ആണ് ടൂർണമെന്റ് നടക്കുന്നത്.
“ഇത് എനിക്ക് വളരെ ബുദ്ധിമുട്ടുള്ള നിമിഷങ്ങളാണ്. നിർഭാഗ്യവശാൽ ഞാൻ മോണ്ടി കാർലോയിൽ കളിക്കാൻ പോകുന്നില്ല എന്ന് നിങ്ങളെ അറിയിക്കുന്നു. എൻ്റെ ശരീരം എന്നെ അനുവദിക്കുന്നില്ല” 11 തവണ ടൂർണമെൻ്റ് വിജയിച്ച നദാൽ പറഞ്ഞു.
കഴിഞ്ഞ വർഷത്തെ ഓസ്ട്രേലിയൻ ഓപ്പണിൽ നദാലിന് ഇടുപ്പിന് പരിക്കേറ്റിരുന്നു. ഇത് കാരണം സീസൺ മുഴുവൻ 37കാരൻ പുറത്തിരിക്കേണ്ടി വന്നു.
ഏറ്റവും പുതിയ എടിപി റാങ്കിങ്ങിൽ മുൻ ലോക ഒന്നാം നമ്പർ താരം നദാൽ 649-ാം സ്ഥാനത്തേക്ക് പിന്തള്ളപ്പെട്ടിരുന്നു.