ഇടുപ്പിന് പരിക്കേറ്റ നദാൽ മാഡ്രിഡ് മാസ്റ്റേഴ്സ് ടൂർണമെന്റിലും പങ്കെടുക്കില്ല എന്ന് അറിയിച്ചു. ഇപ്പോഴും പരിക്ക് മാറിയില്ല എന്നും താനും തന്റെ ടീമും പരിക്ക് മാറാനുള്ള പ്രവർത്തനങ്ങൾ തുടരുകയാണെന്നും നദാൽ പറഞ്ഞു. അടുത്ത മാസം അവസാനം നടക്കുന്ന ഫ്രഞ്ച് ഓപ്പണായുള്ള നദാലിന്റെ തയ്യാറെടുപ്പുകൾക്കും ഈ വാർത്ത കനത്ത തിരിച്ചടിയായി.
ജനുവരിയിൽ ഓസ്ട്രേലിയൻ ഓപ്പണിന്റെ രണ്ടാം റൗണ്ടിൽ തോറ്റതിന് ശേഷം 36കാരനായ സ്പാനിഷ് താരം ഇതുവരെ കളിച്ചിട്ടില്ല. ഇന്ത്യൻ വെൽസിലെയും മിയാമിയിലെയും ടൂർണമെന്റുകളിൽ നിന്നും അദ്ദേഹം നേരത്തെ പിന്മാറിയിരുന്നു. കഴിഞ്ഞ വർഷം 14-ാമത് ഫ്രഞ്ച് ഓപ്പൺ കിരീടം നേടിയതിന് ശേഷം നദാൽ ഫിറ്റ്നസ് പ്രശ്നങ്ങളാൽ ബുദ്ധിമുട്ടിക്കൊണ്ടിരിക്കുകയാണ്.