Category: French Open

ഫ്രഞ്ച് ഓപ്പണിൽ രണ്ടാം ദിനം തന്നെ വമ്പൻ അട്ടിമറി. റഷ്യൻ താരം നാലാം സീഡ് ഡാനിൽ മെദ്വദേവ് ആദ്യ റൗണ്ടിൽ പുറത്ത് ആവുന്നത് ആണ് രണ്ടാം ദിനം കണ്ടത്. കളിമണ്ണ് കോർട്ടിൽ പലപ്പോഴും ബുദ്ധിമുട്ടാറുള്ള മെദ്വദേവ് സീഡ് ചെയ്യാത്ത മാർട്ടൻ ഫുകോവിക്സിനോട് തോൽവി വഴങ്ങിയാണ് ആദ്യ റൗണ്ടിൽ തന്നെ പുറത്ത് പോയത്. രണ്ടാം സെറ്റിൽ ടൈബ്രേക്കർ കണ്ട മത്സരത്തിൽ 4 സെറ്റ് പോരാട്ടത്തിനു ശേഷം ആണ് നാലാം സീഡ് തോൽവി സമ്മതിച്ചത്. മത്സരത്തിൽ എതിരാളിയെ 5 തവണ ബ്രൈക്ക് ചെയ്തു എങ്കിലും 6 തവണ ബ്രൈക്ക് വഴങ്ങിയ മെദ്വദേവ് തോൽവി സമ്മതിക്കുക ആയിരുന്നു.

ആദ്യ സെറ്റ് 6-4 നു അടിയറവ് പറഞ്ഞ റഷ്യൻ താരം രണ്ടാം സെറ്റ് ടൈബ്രേക്കറിലൂടെ കൈവിട്ടു. എന്നാൽ മൂന്നാം സെറ്റിൽ തിരിച്ചു വന്നു 6-2 നു സെറ്റ് നേടിയ താരം പൊരുതും എന്നു തോന്നിയെങ്കിലും നാലാം സെറ്റ് 6-1 ജയിച്ച ഫുകോവിക്സ് മത്സരം സ്വന്തം പേരിൽ കുറിച്ചു. അതേസമയം മറ്റൊരു റഷ്യൻ താരവും 15 സീഡുമായ കാരൻ കാചനോവ് രണ്ടാം റൗണ്ടിലേക്ക് മുന്നേറി. കാമിൽ മചറസാകിനെ 7-6, 6-3, 6-3 എന്ന നേരിട്ടുള്ള സെറ്റുകൾക്ക് ആണ് കാചനോവ് മറികടന്നത്. 5 സെറ്റ് പോരാട്ടത്തിൽ അമേരിക്കൻ താരം ഡെന്നിസ് സാന്റ്ഗ്രനോട് തോറ്റ 29 സീഡ് ഹുബർട് ഹുർകാസും ഫ്രഞ്ച് ഓപ്പൺ ആദ്യ റൗണ്ടിൽ പുറത്ത് ആയി.

ഫ്രഞ്ച് ഓപ്പണിൽ യു.എസ് ഓപ്പണിൽ നിന്നു നിർത്തിയ ഇടത്ത് നിന്നു തുടങ്ങി ജർമ്മൻ താരവും ആറാം സീഡും ആയ അലക്‌സാണ്ടർ സെരവ്. ഫൈനൽ കളിച്ച യു.എസ് ഓപ്പണിന് ശേഷം നേരിട്ട് കളിമണ്ണ് കോർട്ടിൽ കളിക്കാതെ ഫ്രഞ്ച് ഓപ്പണിൽ എത്തിയ സെരവ് ആ കുറവ് ഒന്നും കളത്തിൽ കാണിച്ചില്ല. സീഡ് ചെയ്യാത്ത ഓസ്ട്രിയൻ താരം ഡെന്നിസ് നൊവാക്കിനെ നേരിട്ടുള്ള സെറ്റുകൾക്ക് ആണ് സെരവ് മറികടന്നത്. മത്സരത്തിൽ 10 ഏസുകൾ ഉതിർത്ത സെരവ് എതിരാളിയുടെ സർവീസ് 5 തവണ ബ്രൈക്ക് ചെയ്യുകയും ചെയ്തു. 7-5 നു നേടിയ ആദ്യ സെറ്റിന് ശേഷം വലിയ വെല്ലുവിളി ഒന്നും സെരവ് മത്സരത്തിൽ നേരിട്ടില്ല. 6-2 നു രണ്ടാം സെറ്റും 6-4 നു മൂന്നാം സെറ്റും നേടിയ സെരവ് രണ്ടാം റൗണ്ടിലേക്ക് അനായാസം മുന്നേറി.

എ. ടി. പി മാസ്റ്റേഴ്സ് 1000 റോം ഓപ്പണിൽ കളിമണ്ണ് കോർട്ടിൽ ഫൈനൽ കളിച്ച സാക്ഷാൽ റാഫേൽ നദാലിനെ അട്ടിമറിച്ച ആത്മവിശ്വാസവും ആയി ഫ്രഞ്ച് ഓപ്പണിൽ എത്തിയ അർജന്റീനൻ താരം ഡീഗോ ഷ്വാർട്ട്സ്മാൻ ആ മികവ് തുടരുന്നത് ആണ് പാരീസിലും കണ്ടത്. സീഡ് ചെയ്യാത്ത ക്രൊയേഷ്യൻ താരം മിയോമിർ കെചമനോവിച്ചിനെ 12 സീഡ് ആയ ഷ്വാർട്ട്സ്മാൻ നിലം തൊടീച്ചില്ല. ആദ്യ സെറ്റ് 6-0 ത്തിനു നേടിയ അർജന്റീനൻ താരം മത്സരത്തിൽ ഉടനീളം വെറും 4 പോയിന്റുകൾ മാത്രമേ എതിരാളിക്ക് നൽകിയുള്ളൂ. രണ്ടു തവണ ബ്രൈക്ക് വഴങ്ങിയെങ്കിലും എതിരാളിയെ 9 തവണ ബ്രൈക്ക് ചെയ്ത ഷ്വാർട്ട്സ്മാൻ 6-0, 6-1, 6-3 എന്ന സ്കോറിന് മിന്നും ജയം നേടിയാണ് രണ്ടാം റൗണ്ട് ഉറപ്പിച്ചത്.

മറ്റ് ടെന്നീസ് ടൂർണമെന്റുകളെ അവഗണിച്ചു ടൂർണമെന്റ് മാറ്റി വച്ചും, എ. ടി. പി, ഡബ്യു.ടി.എ അഭിപ്രായങ്ങളെ പോലും പരിഗണിക്കാതെ തീരുമാനങ്ങൾ എടുത്തും വിവാദത്തിൽ ആയ ഫ്രഞ്ച് ഓപ്പണിൽ സാഹചര്യങ്ങൾ താരങ്ങൾക്ക് കഠിനം ആവും എന്നു ആദ്യ ദിനം തന്നെ സൂചനകൾ. കൊറോണ വൈറസ് ലോകത്ത് വിതച്ച നാശങ്ങൾ കാരണം 4 മാസത്തിനു ശേഷം നടത്താൻ തീരുമാനിച്ച ഫ്രഞ്ച് ഓപ്പണിന് മുമ്പും ഫ്രഞ്ച് കാലാവസ്ഥ വില്ലൻ ആവും എന്ന മുന്നറിയിപ്പ് ഉണ്ടായിരുന്നു. അത് സാധൂകരിക്കുന്ന വിധം ആണ് ഇന്ന് കാര്യങ്ങൾ നീങ്ങിയത്. ഡാങ്ക കോവിനിചിനെ ആദ്യ റൗണ്ട് മത്സരത്തിൽ ആണ് അധികൃതർക്ക് എതിരെ ക്ഷുഭിതയായി പത്താം സീഡ് വിക്ടോറിയ അസരങ്ക കളം വിട്ടത്.

മത്സരം തുടങ്ങി ആദ്യ 15 മിനിറ്റിൽ തന്നെ മഴയും തണുപ്പും കളിക്ക് തടസം ആയി. ഏതാണ്ട് 10 ഡിഗ്രി വരെ താഴ്ന്ന ചൂട് താരങ്ങളെ ബുദ്ധിമുട്ടിച്ചു. സാഹചര്യങ്ങൾ വിലയിരുത്താൻ വന്ന അധികൃതർക്ക് നേരെ രൂക്ഷമായി ആണ് അസരങ്ക പ്രതികരിച്ചത്. മത്സരത്തിൽ 2-1 നു മുന്നിട്ടു നിൽക്കുക ആയിരുന്ന അസരങ്ക മഴയത്ത് കളിപ്പിക്കുന്നതിനെയും വിമർശിച്ചു, തങ്ങൾക്ക് റാക്കറ്റ് പോലും മര്യാദക്ക് പിടിക്കാൻ സാധിക്കുന്നില്ലെന്നു പരാതിപ്പെട്ട ബെലാറസ് താരം 8 ഡിഗ്രി തണുപ്പിൽ എങ്ങനെയാണ് കളിക്കുക എന്നും ചോദിച്ചു. താൻ ഇനിയും കാത്തിരിക്കാൻ തയ്യാർ അല്ലെന്ന് പറഞ്ഞ അസരങ്ക ഉടൻ കളം വിടുകയും ചെയ്തു. പിന്നീട് പുനരാരംഭിച്ച മത്സരം 6-1, 6-2 എന്ന നേരിട്ടുള്ള സെറ്റുകൾക്ക് അസരങ്ക കയ്യിലാക്കുകയും ചെയ്തു. പലപ്പോഴും കാറ്റും, മഴയും അടക്കമുള്ള കാലാവസ്ഥ വലിയ പ്രശ്നങ്ങൾ സൃഷ്ടിക്കാറുള്ള ഫ്രഞ്ച് ഓപ്പണിന് നിലവിലെ ഫ്രഞ്ച് സാഹചര്യങ്ങൾ കടുത്ത വെല്ലുവിളി ആവും ഉയർത്തുക എന്നുറപ്പാണ്. അസരങ്കയുടെ പരാതി മറ്റ് താരങ്ങൾ തുടർന്നുള്ള ദിനങ്ങളിൽ ഏറ്റെടുക്കുമോ എന്നു കണ്ടു തന്നെ അറിയണം.

ആദ്യ റൗണ്ടിൽ തന്നെ അട്ടിമറി കണ്ട് ഫ്രഞ്ച് ഓപ്പണിന് തുടക്കം. പതിനൊന്നാം സീഡ് ആയ ബെൽജിയം താരം ഡേവിഡ് ഗോഫിൻ ആണ് ഫ്രഞ്ച് ഓപ്പൺ ആദ്യ റൗണ്ടിൽ തന്നെ ഞെട്ടിക്കുന്ന തോൽവി ഏറ്റുവാങ്ങിയത്. 19 വയസ്സുകാരൻ ആയ സീഡ് ചെയ്യാത്ത ഇറ്റാലിയൻ യുവതാരം യാനിക് സിന്നർ ആണ് നേരിട്ടുള്ള സെറ്റുകൾക്ക് ഗോഫിനെ ഞെട്ടിച്ചത്. മത്സരത്തിൽ ആദ്യ സെറ്റിൽ അല്ലാതെ പിന്നീട് ഒരിക്കലും മത്സരത്തിൽ പിടിച്ചു നിൽക്കാൻ ഗോഫിനു ആയില്ല. 2 തവണ എതിരാളിയെ ബ്രൈക്ക് ചെയ്ത ഗോഫിൻ 7 തവണയാണ് സർവീസ് ബ്രൈക്ക് വഴങ്ങിയത്. 7-5 നു ആദ്യ സെറ്റ് നേടിയ സിന്നർ രണ്ടാം സെറ്റിൽ ഗോഫിനെ ശരിക്ക് നാണം കെടുത്തി 6-0 ത്തിനു സെറ്റ് നേടി. മൂന്നാം സെറ്റ് 6-3 നും നേടിയ ഇറ്റാലിയൻ യുവതാരം റോളണ്ട് ഗാരോസിൽ രണ്ടാം റൗണ്ടിലേക്ക് മുന്നേറി.

32 സീഡ് ആയ ബ്രിട്ടീഷ് താരം ഡാൻ ഇവാൻസിനെ 5 സെറ്റ് പോരാട്ടത്തിൽ മറികടന്ന ജപ്പാൻ താരം കെയ്‌ നിഷികോരിയും ഫ്രഞ്ച് ഓപ്പൺ രണ്ടാം റൗണ്ടിലേക്ക് മുന്നേറി. ആദ്യ സെറ്റ് നഷ്ടമായ ശേഷം ആയിരുന്നു ഒരു ടൈബ്രേക്കർ അടക്കം കണ്ട 5 സെറ്റ് പോരാട്ടത്തിൽ നിഷികോരിയുടെ ജയം. സ്‌കോർ : 1-6, 6-1, 7-6, 1-6, 6-4. അതേസമയം അമേരിക്കൻ താരങ്ങൾ ആയ ജോൺ ഇസ്‌നർ, ടൈയ്‌ലർ ഫ്രിറ്റ്സ് എന്നിവർ രണ്ടാം റൗണ്ടിലേക്ക് മുന്നേറി. 21 സീഡ് ആയ ഇസ്നർ 6-4, 6-1, 6-3 എന്ന നേരിട്ടുള്ള സ്കോറിന് ഫ്രഞ്ച് താരം എലിയറ്റിനെ മറികടന്നു. തോമസിന് എതിരെ 5 സെറ്റ് നീണ്ട കടുത്ത പോരാട്ടത്തിനു ഒടുവിൽ ആയിരുന്നു 27 സീഡ് ആയ ഫ്രിറ്റ്സിന്റെ ജയം.