Category: Australian Open

മുൻ ലോക ഒന്നാം നമ്പർ താരവും മൂന്ന് ഗ്രാൻഡ് സ്ലാമുകൾക്ക് ഉടമയുമായ ബ്രിട്ടന്റെ പ്രൊഫഷണല്‍ ടെന്നീസ് താരം ആന്റി മറെ ഓസ്ട്രേലിയന്‍ ഓപ്പണില്‍ നിന്ന് പുറത്ത്. അവസാന മത്സരത്തിൽ സ്പാനിഷ് താരം റോബെർട്ടോ ബാറ്റിസ്റ്റ അഗട്ടിനോട് 4 മണിക്കൂറോളം നീണ്ട പോരാട്ടത്തിനൊടുവിൽ 4-6, 4-6, 7-6, 7-6, 2-6 എന്ന സ്കോറിനാണ് മറെ കളിക്കളത്തിനോട് വിട പറഞ്ഞത്. കുറച്ച് നാളുകളായി പരിക്കിന്‍റെ പിടിയിലായിരുന്ന മറെ ഇത് തന്‍റെ അവസാന പരമ്പര ആയിരിക്കും എന്ന് അറിയിച്ചിരുന്നു. എന്നാല്‍ ‘Maybe I’ll see you again’ എന്ന മറെയുടെ വാക്കുകള്‍ ടെന്നീസ് ആരാധകരില്‍ വീണ്ടും പുതു പ്രതീക്ഷ നല്‍കിയിരിക്കുകയാണ്. മറെ വിംബിള്‍ഡണ്‍ കൂടി കളിച്ച് നാട്ടില്‍ കരിയര്‍ അവസാനിപ്പിക്കുണമെന്ന ആവശ്യം ഉയര്‍ന്നു വരുന്നതിനിടയിലാണ് ഈ വാക്കുകള്‍.

നേരത്തെ മറെ നല്‍കിയ സൂചനകള്‍ ശരിയാവുകയാണെങ്കില്‍ ഇന്ന് താരത്തിന്റെ അവസാന മത്സരം ആകേണ്ടതാണ്. എന്നാല്‍ ടൂര്‍ണ്ണമെന്റിന്റെ ആദ്യ റൗണ്ടില്‍ തന്നെ  ഏറ്റ തോല്‍വി താരത്തെ വീണ്ടും കോര്‍ട്ടില്‍ തുടരാന്‍ പ്രേരിപ്പിക്കുന്നുവെന്ന് വേണം ഇന്നത്തെ വാക്കുകളില്‍ നിന്ന് ഒരു ടെന്നീസ് പ്രേമി മനസ്സിലാക്കേണ്ടത്.

2013 ലും 16 ലും വിമ്പിൾ കരസ്ഥമാക്കിയ മറെ 2013ൽ യു എസ് ഓപ്പൺ വിജയിയായി. രണ്ടു തവണ ഒളിമ്പിക്സ് ഗോൾഡ് മെഡൽ
സ്വന്തമാക്കിയ മറെ, ബ്രിട്ടൻ കണ്ട ഏറ്റവും മികച്ച ടെന്നീസ് താരങ്ങളിൽ ഒരാളാണ്.

ഓസ്‌ട്രേലിയൻ ഓപ്പണിന്റെ ലൈനപ്പ് പൂർത്തിയായി. നിലവിലെ ചാമ്പ്യൻ റോജർ ഫെഡററും, നദാലും ഒരേ ഹാഫിൽ ആണെന്നുള്ളത് ഫൈനലിന് മുന്നേയുള്ള ഫൈനൽ ആകും എന്നത് തീർച്ച. പക്ഷേ സെമി വരെ എത്തുക എന്നത് ദീർഘകാലമായി പരിക്കിന്റെ പിടിയിലുള്ള നദാലിനും, പ്രായം അത്യാവശ്യം പ്രശ്നങ്ങൾ സൃഷ്ടിക്കുന്ന ഫെഡറർക്കും എളുപ്പമാകില്ല. മറുവശത്ത് മിന്നും ഫോമിലുള്ള ജോക്കോവിച്ച് ടൂർ ഫൈനൽസിൽ തന്നെ പരാജയപ്പെടുത്തിയ സ്വരേവിന്റെ ഹാഫിലാണ്. പക്ഷേ മേജർ ടൂർണമെന്റുകളിൽ യുവനിരയ്ക്ക് കാര്യമായ വെല്ലുവിളികൾ ഉയർത്താൻ സാധിക്കുന്നില്ല എന്നത് കണക്കിലെടുത്താൽ ജോക്കോവിച്ച് ഫൈനൽ വരെ എത്തുമെന്ന് തന്നെ കണക്ക് കൂട്ടാം. പരിക്കിൽ നിന്ന് മുക്തനായി മറെയും എത്തുന്നുണ്ട്. ഇതോടെ കുറേ കാലങ്ങൾക്ക് ശേഷം ‘ബിഗ് ഫോർ’ ഒരുമിച്ച് കളത്തിൽ ഇറങ്ങുന്ന ടൂർണമെന്റ് എന്ന പ്രത്യേകതയും ഓസ്‌ട്രേലിയൻ ഓപ്പണിനുണ്ട്.

വനിതകളിൽ സിമോണ ഹാലെപ്, സെറീന എന്നിവർ ഒരേ ഹാഫിലാണ്. ആദ്യ മത്സരത്തിൽ സിമോണ നേരിടുന്നത് കനേപ്പിയെ ആണെന്നത് തുടക്കം മുതൽ ഒന്നാം സീഡിന് കാര്യങ്ങൾ അവതാളത്തിലാക്കും.

പ്രവചനം : കഴിവിനൊത്ത് ഉയരാത്ത യുവനിര ഇത്തവണ പുരുഷന്മാരുടെ ഫൈനലിൽ എത്തുകയോ, കപ്പ് ഉയർത്തുകയോ ചെയ്താൽ അത്ഭുതപ്പെടാനില്ല. പുരുഷ ടെന്നീസിൽ മാറ്റങ്ങൾക്ക് സമയമായി എന്നുതന്നെയാണ് കഴിഞ്ഞ വർഷം നൽകുന്ന സൂചന.

നിത്യയൗവ്വനം(Vintage)! റോജർ ഫെഡററിനോട് ചേർത്ത് പലരും പറയുന്ന ഒരു പദമാണിത്. 36 മത്തെ വയസ്സിൽ ഗ്രാൻഡ്സ്ലാം ജയിക്കുന്ന, ഇങ്ങനെ പൊരുതുന്ന മനുഷ്യനെ എന്ത് വിളിക്കാനാണ് പിന്നെ. ടെന്നീസ് പോലെ ഇത്രയും കായികക്ഷമത വേണ്ടൊരു കളിയിൽ തനിക്ക് 10 വയസ്സിന് താഴെയുള്ളവരോട് പൊരുതി നിൽക്കുന്ന, 3,4 മണിക്കൂർ 5 സെറ്റ് കളിക്കുന്ന ‘വയസ്സൻ’ ഫെഡററിൽ യൗവ്വനമില്ലാതെയെങ്ങനെയാണ്. എത്രത്തോളം അനുഗ്രഹീതനെന്ന് പറഞ്ഞാലും വയസ്സിനെ കീഴടുക്കുന്ന ഏതോ മന്ത്രവാദിയാണ് ഫെഡറർ എന്ന് ചിലർ സംശയിച്ചാലും അതിശയിക്കേണ്ടതില്ല. പക്ഷെ കളി കഴിഞ്ഞ് ജയിച്ചതിന്റെ അഹങ്കാരമോ അമിതാഹ്ലാതമോ ഇല്ലാതെ കരയുന്ന ഫെഡററെ കാണുമ്പോൾ വീണ്ടും ഇതായിരുന്നോ ആ ഫെഡറർ എന്ന് വീണ്ടും സംശയിക്കും.

അല്ലെങ്കിൽ ഫെഡറർ ഒരു Vampire(രക്തരക്ഷസ്) ആണോ? മറ്റുള്ളവരുടെ യൗവ്വനം മോഷ്ടിക്കുന്ന രക്തരക്ഷസ്! ഇന്ന് ഫൈനലിൽ അഞ്ചാം സെറ്റിൽ വന്ന സംശയമാണിത്. എന്തൊരു ടെന്നീസാണ് സിലിച്ച് നാലാം സെറ്റിൽ പുറത്തെടുത്തെത്. ബ്രക്ക് വഴങ്ങിയ ശേഷം അസാധ്യമെന്ന് തോന്നുന്ന ടെന്നീസ് കളിച്ച സിലിച്ചിനെ കണ്ടപ്പോൾ സങ്കടം കൊണ്ട് മുഖം കുനിഞ്ഞു. ഇനിയില്ല എന്ന് ആരോ മനസ്സിൽ പറയുന്ന പോലെ.

5 സെറ്റ് മത്സരത്തിൽ ഫെഡററെ തോൽപ്പിച്ചവർ വിരലിലെണ്ണാവുന്നവരെന്ന് അറിഞ്ഞിട്ടും, 2 – 1 സെറ്റ് ലീഡ് ചെയ്തിട്ട് ഒരിക്കൽ മാത്രമെ ഫെഡറർ തോറ്റിട്ടുള്ളു എന്നറിഞ്ഞിട്ടും ഒരുൾവിളി. എന്തോ 36 കാരൻ വയസ്സനല്ലെ ഫെഡറർ എന്ന ചിന്തയാണോ എന്നറിയില്ല. ഇതേ പോലെ തന്നെയായിരുന്നു കഴിഞ്ഞ വർഷവും നദാൽ അവസാനം വരെ ജയിക്കും(കൂടുതൽ സങ്കടം വരാതിരിക്കാൻ) എന്ന് പറഞ്ഞ് തന്നെയാണ് ടി.വിക്ക് മുമ്പിലിരുന്നത്.

പക്ഷെ മറന്ന് പോയത് ഇത് ഫെഡറർ ആണെന്നതാവണം. നാലാം സെറ്റിലെ ഫെഡററെ ആയിരുന്നില്ല അഞ്ചിൽ. ആദ്യ സർവ്വീസ് രണ്ട് ബ്രക്ക് പോയിന്റിൽ നിന്ന് രക്ഷപ്പെട്ട ശേഷം കണ്ടത് ആ സോ കോൾഡ് വിന്റേജ് ഫെഡററെ ആയിരുന്നു. സിലിച്ചിന്റെ മൊത്തം ഊർജ്ജവും വലിച്ചെടുത്ത പോലെ ബ്രക്കിന് പിറകെ ബ്രക്കും സെറ്റും, മത്സരവും ഫെഡറർ സ്വന്തമാക്കുന്നത് കണ്ടപ്പോൾ നാലാം സെറ്റ് നടന്നത് കുറെ വർഷം മുമ്പോ എന്ന് സംശയിച്ച്. ശരിക്കും ഇതാണ് ഫെഡറർ, എന്നും എല്ലാർക്കും ഒരുപിടി മുകളിൽ നിൽക്കുന്നവൻ. ജയിച്ചപ്പോൾ സന്തോഷം അടക്കാൻ വയ്യാത്തപ്പോയും ഓടി വന്നത് കഴിഞ്ഞ വർഷമായിരുന്നു, നദാലിനെ തോൽപ്പിച്ച 18 ന്റെ മധുരത്തിന് പകരമാവാൻ ഒരു 20 തിനുമാവില്ലെന്ന് ആരറിയുന്നു.

മത്സരശേഷം ഫെഡറിനൊപ്പം ലോകം മൊത്തം കരഞ്ഞിരിക്കണം. ഇത് പഴയ വയസ്സൻ ഫെഡറർ തന്നെ. നിത്യയൗവ്വനം മോഹിക്കുന്ന രക്തരക്ഷസല്ല അയ്യാൾ. 20 ഗ്രാൻഡ്സ്ലാം നേട്ടത്തിലും, റെക്കോർഡ് ആസ്ട്രേലിയൻ ഓപ്പൺ നേട്ടത്തിലും എളിമയോടെ മനുഷ്യനായി നിൽക്കാൻ കഴിയുന്ന ഇതിഹാസമാണയാൾ, വെറും മനുഷ്യൻ. അതാവും ഫെഡററിനെ എല്ലാർക്കും ഇഷ്ടം, അല്ലേൽ ആർക്കാണയ്യാളെ വെറുക്കാൻ പറ്റുക.

അയ്യാളെല്ല ലോകത്തെ ഏറ്റവും മഹാനായ എക്കാലത്തേയും മികച്ച ടെന്നീസ് താരമെന്ന് കരുതുന്നവർ ഇനിയും കാണും പക്ഷെ അയ്യാളാണ് ടെന്നീസ് കണ്ട സ്പോർട്സ് കണ്ട ഏറ്റവും മഹാനായ മനുഷ്യനെന്ന് അവര് പോലും സമ്മതിച്ചേക്കും. ചിലപ്പോൾ ടെന്നീസിനേക്കാൾ അയ്യാൾ വളർന്നിരിക്കണം. മനസ്സിൽ ഫെഡറർ ബിംബമായി കൊണ്ട് നടക്കുന്ന, ഈ ഗ്രാൻഡ്സ്ലാം പോലും രണ്ട് ദിവസം കഴിഞ്ഞ് വരുന്ന പിറന്നാളിനു മാസ്റ്ററിന്റെ സമ്മാനമായി കരുതുന്ന റോജർ ഫെഡറർ ഫാനിന് അയ്യാൾക്കപ്പുറം ഒന്നുമില്ല. അതാവും ഇന്നും ഫെഡറർ വിരമിക്കണം എന്ന് പറയുന്നവരോട് അടക്കാത്ത ദേഷ്യം വരുന്നത്. ഫെഡറർ ഒരു വീഞ്ഞാണ്, വിലമതിക്കാനാവാത്ത, പ്രായം കൂടും തോറും വീര്യം കൂടുന്ന, മയക്കുന്ന, പ്രണയത്തിലാക്കുന്ന വീഞ്ഞ്. ആസ്വദിക്കുക മതിവരോളം കാരണം ഇനി ഇത് പോലൊന്ന് ഒരിക്കലും കാണില്ല.

കൂടുതൽ കായിക വാർത്തകൾക്ക് : www.facebook.com/FanportOfficial

ഓസ്‌ട്രേലിയൻ ഓപ്പണിൽ തന്റെ 20ആം ഗ്രാൻഡ് സ്ലാം കിരീടം നേടി റോജർ ഫെഡറർ. ഫൈനലിൽ മരിൻ സിലിച്ചിനെ തോൽപ്പിച്ചാണ് ഫെഡറർ തന്റെ ആറാമത്തെ ഓസ്‌ട്രേലിയൻ ഓപ്പൺ കിരീടം തന്റെ ഷെൽഫിലെത്തിച്ചത്. അഞ്ച് സെറ്റ് നീണ്ട കടുത്ത പോരാട്ടത്തിലാണ് ഫെഡറർ കിരീടം സ്വന്തമാക്കിയത്.  സ്കോർ 6-2,6-7(7/5),6-3,3-6,6-1.

ഇതോടെ ആധുനിക പുരുഷ ടെന്നീസിലെ പകരം വെക്കാനില്ലാത്ത ആൾരൂപമായി 36കാരനായ ഫെഡറർ. മെൽബണിലെ കഠിനമായ ചൂടിലും തളരാതെ അഞ്ച് സെറ്റ് പോരാട്ടത്തിലാണ് ഫെഡറർ കിരീടം ചൂടിയത്.

കൂടുതൽ കായിക വാർത്തകൾക്ക് : www.facebook.com/FanportOfficial