Category: Australian Open

6 മാസങ്ങൾക്ക് മുമ്പ് വിംബിൾഡനിൽ സംഭവിച്ചത് വീണ്ടും ആവർത്തിക്കപ്പെട്ടു. ഓസ്‌ട്രേലിയൻ ഓപ്പണിൽ ആദ്യ റൗണ്ടിൽ ഇതിഹാസതാരം വീനസ് വില്യംസിനെ വീണ്ടും പരാജയപ്പെടുത്തി കൊക്കോ ഗോഫ്. നാട്ടുകാരിയായ 39 കാരിക്ക് എതിരെ തന്റെ ആദ്യ ഓസ്‌ട്രേലിയൻ ഓപ്പണിൽ മികച്ച പ്രകടനം ആണ് 15 കാരിയായ ഗോഫ് പുറത്ത് എടുത്തത്. ടൈബ്രെക്കറിലേക്ക് നീണ്ട ആദ്യ സെറ്റിൽ വീനസിന്റെ പരിചയസമ്പത്തിനെ മറികടന്ന ഗോഫ് 7-6 നു സെറ്റ് സ്വന്തമാക്കി മത്സരം തന്റെ വരുതിയിലാക്കി. രണ്ടാം സെറ്റിലും തന്റെ മികവ് തുടർന്ന ഗോഫ് 6-3 നു രണ്ടാം സെറ്റും മത്സരവും സ്വന്തമാക്കി. സോറേന ക്രിസ്റ്റിയാണ് കോഫിന്റെ രണ്ടാം റൗണ്ടിലെ എതിരാളി. ഇതിൽ ജയിച്ചാൽ മൂന്നാം റൗണ്ടിൽ നിലവിലെ ജേതാവ് നയോമി ഒസാക്ക ആവും ഗോഫിന്റെ എതിരാളി.

അതേസമയം ബ്രിട്ടീഷ് പ്രതീക്ഷയായ 12 സീഡ് യോഹാന കോന്റെ ഓസ്‌ട്രേലിയൻ ഓപ്പൺ ആദ്യ റൗണ്ടിൽ പുറത്തായി. ഒന്സ് ജബേർ 6-4,6-2 എന്ന നേരിട്ടുള്ള സെറ്റുകൾക്ക് ആണ് ബ്രിട്ടീഷ് താരത്തെ അട്ടിമറിച്ചത്. വലിയ തിരിച്ചടിയായി കോന്റെക്ക് ഈ പരാജയം. അതേസമയം 10 സീഡ് അമേരിക്കയുടെ മാഡിസൺ കീയ്‌സ് രണ്ടാം റൗണ്ടിലേക്ക് മുന്നേറി. റഷ്യയുടെ ദാരിയ കസ്ത്കിനയെ നേരിട്ടുള്ള സെറ്റുകൾക്ക് ആണ് കീയ്‌സ് മറികടന്നത്. 6-3, 6-1 എന്ന സ്കോറിന് മത്സരം ജയിച്ച അമേരിക്കൻ താരത്തിൽ നിന്ന് മികച്ച പ്രകടനം തന്നെയാണ് ഉണ്ടായത്.

ഓസ്‌ട്രേലിയൻ ഓപ്പണിൽ രണ്ടാം റൗണ്ടിലേക്ക് മുന്നേറി നൊവാക്‌ ജ്യോക്കോവിച്ച്. രണ്ടാം സീഡ് ആയ സെർബിയൻ താരം ജർമ്മനിയുടെ സീഡ് ചെയ്യാത്ത യാൻ ലനാർഡ് സ്ട്രഫിനെ നാല് സെറ്റ് നീണ്ട മത്സരത്തിൽ മറികടന്ന് ആണ് രണ്ടാം റൗണ്ടിലേക്ക് മുന്നേറിയത്. ജയത്തോടെ തന്റെ കരിയറിലെ 900 മത്തെ ജയം ആണ് ജ്യോക്കോവിച്ച് സ്വന്തമാക്കിയത്. രണ്ടാം സീഡ് ആണെങ്കിലും ഹാർഡ് കോർട്ടിലെ ഏറ്റവും മികച്ച താരമായി കണക്കാക്കുന്ന ജ്യോക്കോവിച്ചിനു തന്നെയാണ് ഓസ്‌ട്രേലിയയിൽ ഏറ്റവും കൂടുതൽ കിരീട സാധ്യത കൽപ്പിക്കുന്നത്. ആദ്യ മത്സരത്തിൽ ഒരു സെറ്റ് കൈവിട്ടു എങ്കിലും മികച്ച പ്രകടനം ആണ് ജ്യോക്കോവിച്ചിൽ നിന്നുണ്ടായത്. ടൈബ്രെക്കറിലൂടെ ആദ്യ സെറ്റ് നേടിയ ജ്യോക്കോവിച്ച് രണ്ടാം സെറ്റ് 6-2 നു അനായാസം നേടി. എന്നാൽ തിരിച്ചു വന്ന ജർമ്മൻ താരം മൂന്നാം സെറ്റ് 6-2 നു നേടി മത്സരം നാലാം സെറ്റിലേക്ക് നീട്ടി. എന്നാൽ നാലാം സെറ്റിൽ തന്റെ വിശ്വരൂപം പുറത്തെടുത്ത ജ്യോക്കോവിച്ച് 6-1 നു നാലാം സെറ്റും മത്സരവും സ്വന്തമാക്കി.

ഓസ്‌ട്രേലിയയിൽ തന്റെ 17 മത്തെ ഗ്രാന്റ് സ്‌ലാം കിരീടം ലക്ഷ്യമിടുന്ന ഓസ്‌ട്രേലിയയിൽ കിരീടം നിലനിർത്താൻ ആണ് ശ്രമിക്കുന്നത്. നിലവിൽ ഓസ്‌ട്രേലിയൻ ഓപ്പൺ കിരീടങ്ങൾ ഏറ്റവും കൂടുതൽ ഉള്ള ജ്യോക്കോവിച്ച് ആ റെക്കോർഡ് മെച്ചപ്പെടുത്താൻ കൂടിയാണ് ശ്രമിക്കുന്നത്. ഒന്നാം റൗണ്ട് ജയത്തോടെ കരിയറിലെ 900 മത്തെ ജയം കുറിച്ച ജ്യോക്കോവിച്ച് ചരിത്രനേട്ടം ആണ് സ്വന്തമാക്കിയത്. ഇതിഹാസതാരങ്ങൾ ആയ കോണോർസ്, ലെന്റിൽ, വിലാസ് എന്നിവർക്ക് പുറമെ തന്റെ സമകാലികർ ആയ ഫെഡറർ, നദാൽ എന്നിവർക്ക് ശേഷം ഈ നേട്ടം കൈവരിക്കുന്ന താരമായി മാറിയിരിക്കുകയാണ് ജ്യോക്കോവിച്ച് ഇതോടെ. ഫെഡറർക്ക് പുൽ കോർട്ട് എന്ന പോലെ നദാൽക്ക് കളിമണ്ണ് കോർട്ട് എന്ന പോലെ ഹാർഡ് കോർട്ടിൽ ആണ് ജ്യോക്കോവിച്ചിന്റെ ജയങ്ങളിൽ അധികവും.

കരിയറിലെ 78 മത്തെ കിരീടം ഈ ഓസ്‌ട്രേലിയൻ ഓപ്പണിലൂടെ ലക്ഷ്യം വക്കുന്ന ജ്യോക്കോവിച്ച് ഓസ്‌ട്രേലിയൻ ഓപ്പണിലെ ഹാർഡ് കോർട്ടിൽ കളിച്ച 77 മത്സരങ്ങളിൽ 69 ലും ജയം കണ്ടിട്ടുണ്ട്. കൂടാതെ കരിയറിലെ 64% ജയങ്ങളും ഹാർഡ് കോർട്ടിൽ ആണ് എന്നത് ജ്യോക്കോവിച്ചിന്റെ ഓസ്‌ട്രേലിയയിലെ കിരീടസാധ്യത കൂട്ടുന്നുണ്ട്. ഗ്രാന്റ് സ്‌ലാമിലെ 281 മത്തെ ജയം ആയിരുന്നു ജ്യോക്കോവിച്ചിനു ഇത്, കൂടാതെ തുടർച്ചയായ 10 ജയം ആണ് ജ്യോക്കോവിച്ച് ഓസ്‌ട്രേലിയയിൽ കുറിച്ചത്. തൊട്ട് മുമ്പ് നടന്ന എ. ടി. പി കപ്പിൽ സെർബിയയെ കിരീടം അണിയിച്ച ജ്യോക്കോവിച്ചിനെ തടയാൻ ഓസ്‌ട്രേലിയയിൽ ആർക്കെങ്കിലും ആവുമോ എന്ന് കണ്ടറിയണം. ചരിത്രനേട്ടത്തിൽ അഭിമാനം ഉണ്ടെന്ന് എന്നായിരുന്നു ജ്യോക്കോവിച്ച് മത്സരശേഷം പ്രതികരിച്ചത്. കൂടാതെ ഈ നേട്ടം തന്റെ മുന്നോട്ടുള്ള കുതിപ്പിന് വലിയ പ്രചോദനം ആവും എന്നും ലോക രണ്ടാം നമ്പർ താരം കൂട്ടിച്ചേർത്തു. 2003 ൽ കരിയർ തുടങ്ങിയ ജ്യോക്കോവിച്ചിനു ഈ നിലക്ക് 3,4 കൊല്ലം കൂടി തുടരാൻ ആയാൽ ഏറ്റവും കൂടുതൽ ഗ്രാന്റ് സ്‌ലാം കിരീടങ്ങൾ റോജർ ഫെഡററിന്റെ റെക്കോർഡ് പഴയ കഥയാവും എന്നുറപ്പാണ്.

ഓസ്‌ട്രേലിയൻ ഓപ്പണിൽ ആദ്യ റൗണ്ടിൽ തന്നെ പുറത്തായി കാനഡയുടെ യുവതാരവും 13 സീഡുമായ ഡെന്നിസ് ഷാപോവലോവ്. മാർട്ടൺ ഫുസോവിക്സ് ആണ് കനേഡിയൻ താരത്തിന്റെ മുന്നോട്ടുള്ള കുതിപ്പിന് അന്ത്യമിട്ടത്. നാല് സെറ്റ് നീണ്ട മത്സരത്തിൽ പക്ഷെ തന്റെ മികച്ച പ്രകടനം നടത്താൻ കനേഡിയൻ താരത്തിന് ആയില്ല. ആദ്യ സെറ്റ് 6-3 നു കൈവിട്ട ഷാപോവലോവ് രണ്ടാം സെറ്റ് ടൈബ്രെക്കറിലൂടെ തിരിച്ചു പിടിച്ചു എങ്കിലും മൂന്നാം സെറ്റ് 6-1 നു സ്വന്തമാക്കിയ മാർട്ടൺ മത്സരത്തിൽ ആധിപത്യം പിടിച്ചു. നാലാം സെറ്റ് ടൈബ്രെക്കറിലേക്ക് നീട്ടാൻ ഷാപോവലോവിന് ആയെങ്കിലും അനിവാര്യമായ തോൽവി പക്ഷെ ഒഴിവാക്കാൻ ആയില്ല.

അതേസമയം 25 സീഡ് ക്രൊയേഷ്യയുടെ ബോർണ കോരിക്കും ഓസ്‌ട്രേലിയൻ ഓപ്പണിൽ ആദ്യ റൗണ്ടിൽ പുറത്തായി. അമേരിക്കയുടെ വലിയ സർവീസുകൾക്ക് പേര് കേട്ട സീഡ് ചെയ്യാത്ത സാം ക്യൂറേയാണ് കോരിക്കിനെ അട്ടിമറിച്ചത്. 6-3,6-4,6-4 എന്ന നേരിട്ടുള്ള സ്കോറിന് ആയിരുന്നു ക്യൂറേയുടെ ജയം. മത്സരത്തിൽ 18 ഏസുകൾ ആണ് അമേരിക്കൻ താരം ഉതിർത്തത്. അതേസമയം 22 സീഡ് അർജന്റീനയുടെ പെല്ല ഓസ്‌ട്രേലിയൻ താരം ജോൺ പാട്രിക്‌ സ്മിത്തിനെ നേരിട്ടുള്ള സെറ്റുകൾക്ക് മറികടന്ന് രണ്ടാം റൗണ്ടിലേക്ക് മുന്നേറി. സ്‌കോർ – 6-3,7-5,6-4.

ഓസ്‌ട്രേലിയയിലെ കാട്ട് തീയെയും അതിജീവിച്ച് വർഷത്തിലെ ആദ്യ ഗ്രാന്റ് സ്‌ലാം ആയ ഓസ്‌ട്രേലിയൻ ഓപ്പണ് മുമ്പ് പ്രഖ്യാപിച്ച സമയത്ത് തന്നെ തുടക്കം. ആദ്യ ദിനമായ ഇന്ന് പുരുഷവിഭാഗത്തിൽ ഏതാണ്ട് അനായാസമായ തുടക്കം ആണ് പ്രമുഖ താരങ്ങൾക്ക് ലഭിച്ചത്. രാവിലെ സീഡ് ചെയ്യാത്ത അമേരിക്കൻ താരം സ്റ്റീവ് ജോൺസന് എതിരെ തന്റെ മികച്ച പ്രകടനം ആണ് 20 തവണ ഗ്രാന്റ് സ്‌ലാം ജേതാവ് ആയ സ്വിസ് ഇതിഹാസതാരം റോജർ ഫെഡറർ പുറത്തെടുത്തത്. ഇത്തവണ ഓസ്‌ട്രേലിയയിൽ മൂന്നാം സീഡ് ആയ ഫെഡറർ 82 മിനിറ്റ് നീണ്ട മത്സരത്തിൽ നേരിട്ടുള്ള സെറ്റുകൾക്ക് ജോൺസന്റെ വെല്ലുവിളി അവസാനിപ്പിച്ചു. 6-3,6-2,6-2 എന്ന സ്കോറിന് അവസാനിച്ച മത്സരത്തിൽ ഉടനീളം പൂർണ്ണ ആധിപത്യം ആണ് ഫെഡറർ പുറത്തെടുത്തത്.

ഈ മികച്ച തുടക്കം ടൂർണമെന്റിൽ ഫെഡറർക്ക് വലിയ ആത്മവിശ്വാസം ആവും പകരുക. 2020 ൽ ആദ്യ മത്സരം കളിച്ച ഫെഡറർക്ക് വർഷത്തിലെ ആദ്യ ജയം കൂടിയായിരുന്നു ഇത്. അതേസമയം ഈ വർഷം അടുത്ത തലമുറയിൽ ഏറ്റവും അധികം സാധ്യത കൽപ്പിക്കുന്ന എ. ടി. പി ജേതാവ് കൂടിയായ ആറാം സീഡ് ഗ്രീക്ക് താരം സ്റ്റെഫനോസ് സ്റ്റിസ്റ്റിപാസ് തന്റെ തുടക്കം അതിഗംഭീരമാക്കി. സീഡ് ചെയ്യാത്ത ഇറ്റാലിയൻ താരം കരൂസോക്ക് എതിരെ നേരിട്ടുള്ള സെറ്റുകൾക്ക് ജയം കണ്ട ഗ്രീക്ക് താരം തന്നെ അത്ര എളുപ്പം കിരീടപോരാട്ടത്തിൽ നിന്ന് എഴുതി തള്ളേണ്ട എന്ന വ്യക്തമായ സൂചന നൽകി. ആദ്യ സെറ്റിൽ എതിരാളിക്ക് ഒരു പോയിന്റ് പോലും നൽകാതിരുന്ന ഗ്രീക്ക് താരം രണ്ടാം സെറ്റ് 6-2 നും മൂന്നാം സെറ്റ് 6-3 നും സ്വന്തമാക്കി രണ്ടാം റൗണ്ടിലേക്ക് മുന്നേറി.

അതേസമയം ഓസ്‌ട്രേലിയൻ താരം ആൻഡ്രൂ ഹാരിസിനെ മറികടന്ന് യുവ ഇറ്റാലിയൻ താരം എട്ടാം സീഡ് മാറ്റിയോ ബരേറ്റിനിയും രണ്ടാം റൗണ്ടിലേക്ക് മുന്നേറി. നേരിട്ടുള്ള സെറ്റുകൾക്ക് ആയിരുന്നു ബരേറ്റിനിയുടെ ജയം. സ്‌കോർ : 6-3,6-1,6-3. അതേസമയം 18 സീഡ് ഗ്രിഗോർ ദിമിത്രോവും ഓസ്‌ട്രേലിയൻ ഓപ്പൺ രണ്ടാം റൗണ്ടിലേക്ക് മുന്നേറി. അർജന്റീനയുടെ ലോണ്ടേറോക്ക് എതിരെ ആദ്യ സെറ്റ് 4-6 നു നഷ്ടമായ ശേഷം ആയിരുന്നു ദിമിത്രോവിന്റെ ജയം. സ്‌കോർ : 4-6, 6-2,6-0,6-4.