ഓസ്ട്രേലിയൻ ഓപ്പൺ കിരീടം നിലനിർത്താം എന്ന റാഫേൽ നദാൽ മോഹങ്ങൾക്ക് അപ്രതീക്ഷിത തിരിച്ചടി. ടോപ്പ് സീഡ് ആയ റാഫേൽ നദാൽ രണ്ടാം റൗണ്ടിൽ തന്നെ പുറത്തായിരിക്കുകയാണ്. 22 തവണ മേജർ ചാമ്പ്യനായ നദാലിനെ മക്കെൻസി മക്ഡൊണാൾഡ് ആണ് പരാജയപ്പെടുത്തിയത്. 6-4, 6-4, 7-5 എന്നായിരുന്നു സ്കോർ. മത്സരത്തിനു മധ്യത്തിൽ നദാലിന് പരിക്കേറ്റതും മക്കെൻസിക്ക് സഹായകരമായി.
റാഫേൽ വേദന കൊണ്ട് കളി നിർത്തിവെക്കേണ്ടി വന്നെങ്കിലും കളി പൂർത്തിയാക്കാൻ തന്നെ നദാൽ തീരുമാനിക്കുകയായിരുന്നു. പരിക്ക് സഹിച്ച് കളിച്ച അവസാന സെറ്റ് ആവേശകരമായാണ് പര്യവസാനിച്ചത്. മക്കെൻസിയുടെ കരിയറിലെ ഏറ്റവും വലിയ വിജയമാണ് ഇന്നത്തേത്. 31-ാം സീഡ് യോഷിഹിതോ നിഷിയോകയും ഡാലിബോർ സ്വ്ർസിനയും തമ്മിലുള്ള മത്സരത്തിലെ വിജയിയെ ആകും മക്കെൻസി ഇനി നേരിടുക.