ഒസാക്കയ്ക്ക് ഓസ്‌ട്രേലിയൻ ഓപ്പൺ

- Advertisement -

ഓസ്‌ട്രേലിയൻ ഓപ്പൺ വനിതാ സിംഗിൾസ് കിരീടം ജപ്പാന്റെ നവോമി ഒസാക്ക സ്വന്തമാക്കി. അവസാനം വരെ ആവേശം നിറഞ്ഞു നിന്ന മത്സരത്തിൽ രണ്ടുതവണ വിംബിൾഡൺ ജേത്രി കൂടിയായ ചെക്കിന്റെ ക്വിവിറ്റോവയെ മൂന്ന് സെറ്റുകൾ നീണ്ട പോരാട്ടത്തിലാണ് യുവതാരം കീഴടക്കിയത്. സ്‌കോർ 7-6,5-7,6-4.

രണ്ടാം സെറ്റിൽ മൂന്ന് ചാമ്പ്യൻഷിപ്പ് പോയിന്റുകൾ ലഭിച്ചെങ്കിലും ഒന്ന് പോലും മുതലാക്കാൻ ഒസാക്കയ്ക്ക് കഴിഞ്ഞിരുന്നില്ല. തിരിച്ചടിച്ച് സെറ്റ് ക്വിവിറ്റോവ നേടിയതോടെ മത്സരം ആവേശകരമായ മൂന്നാം സെറ്റിലേക്ക് നീണ്ടു. തുടക്കത്തിലെ ബ്രേക്ക് നിലനിർത്തിയ ഒസാക്ക സെറ്റും മത്സരവും സ്വന്തമാക്കി. ഓസ്‌ട്രേലിയൻ ഓപ്പൺ കിരീടനേട്ടത്തോടെ ഒന്നാം സ്ഥാനവും ഒപ്പം ഒരുപിടി റെക്കോർഡുകളും സ്വന്തം പേരിൽ എഴുതാനും ജപ്പാൻ താരത്തിനായി. കഴിഞ്ഞ യുഎസ് ഓപ്പണിൽ സെറീനയെ തകർത്ത് ആദ്യ സ്ലാം നേടിയ ശേഷം തുടർച്ചയായി ഒരു സ്ലാം കൂടി നേടുന്ന താരം, (2001 ന് ശേഷം), ആദ്യ ഏഷ്യൻ ഒന്നാം നമ്പർ, വോസ്നിയാക്കിക്ക് ശേഷം ഏറ്റവും പ്രായം കുറഞ്ഞ ഒന്നാം നമ്പർ അങ്ങനെ ഒരുപിടി റെക്കോർഡുകളുമായാണ് ഒസാക്ക മടങ്ങുന്നത്.

മറുവശത്ത് ജീവിതത്തിൽ അപ്രതീക്ഷിതമായി സംഭവിച്ച പ്രതിസന്ധികളിൽ നിന്ന് കയറി വന്നാണ് ക്വിവിറ്റോവ ഫൈനലിൽ എത്തിയത്. അതുകൊണ്ട് തന്നെയാകണം ക്വിവിറ്റോവയക്ക് എതിരെ കളിക്കാൻ സാധിച്ചത് ബഹുമതിയായി കാണുന്നുവെന്ന് ഒസാക്ക പറഞ്ഞതും.

Advertisement