Tag: Women’s U19

നാഗ്പൂർ: വിമൻസ് അണ്ടർ 19 ഏകദിനത്തിൽ രാജസ്ഥാനെ 79 റൺസിന് തോല്പിച്ച് കേരളം. ആദ്യം ബാറ്റ് ചെയ്ത കേരളം, 50 ഓവറിൽ, നാല് വിക്കറ്റ് നഷ്ടത്തിൽ 264 റൺസെടുത്തു. മറുപടി ബാറ്റിങ്ങിന് ഇറങ്ങിയ രാജസ്ഥാൻ 47.1 ഓവറിൽ 185 റൺസിന് ഓൾ ഔട്ടാവുകയായിരുന്നു.

മുൻ നിര ബാറ്റർമാരുടെ മികച്ച പ്രകടനമാണ് കേരളത്തിൻ്റെ വിജയത്തിൽ നിർണ്ണായകമായത്. ആദ്യം ബാറ്റ് ചെയ്ത കേരളത്തിന് ഓപ്പണർമാരായ ശ്രേയ പി സിജുവും ശ്രദ്ധ സുമേഷും ചേർന്ന് മികച്ച തുടക്കമാണ് നല്കിയത്. മികച്ച റൺറേറ്റിൽ സ്കോർ ഉയർത്തിയ ഇരുവരും ചേർന്ന് 96 റൺസെടുത്തു. ശ്രദ്ധ 44 റൺസെടുത്ത് പുറത്തായി. തുടർന്നെത്തിയ വിസ്മയയും 45 റൺസുമായി മികച്ച പ്രകടനം കാഴ്ച വച്ചു. ഇന്നിങ്സിൽ ഉടനീളം ഒരുവശത്ത് ഉറച്ച് നിന്ന് പൊരുതിയ ശ്രേയ പി സിജുവിൻ്റെ പ്രകടനമാണ് കേരളത്തിൻ്റെ സ്കോർ 250 കടത്തിയത്. ഓപ്പണറായി ഇറങ്ങിയ ശ്രേയ 107 റൺസുമായി പുറത്താകാതെ നിന്നു. രാജസ്ഥാന് വേണ്ടി മൈന സിയോൾ മൂന്ന് വിക്കറ്റ് വീഴ്ത്തി.

മറുപടി ബാറ്റിങ്ങിന് ഇറങ്ങിയ രാജസ്ഥാൻ ഇന്നിങ്സിൽ ആർക്കും മികച്ച പ്രകടനം കാഴ്ച വയ്ക്കാനായില്ല. ഇഷിതയും ഇഷ ജോബിനും ചേർന്ന് രാജസ്ഥാൻ ഇന്നിങ്സ് 185ലേക്ക് ചുരുട്ടിക്കെട്ടി. ഇഷ ജോബിൻ നാലും ഇഷിത മൂന്നും വിക്കറ്റുകൾ വീഴ്ത്തി

നാഗ്പൂർ : വിമൻസ് അണ്ടർ 19 ഏകദിന ക്രിക്കറ്റിൽ ത്രിപുരയ്ക്കെതിരെ ഉജ്ജ്വല വിജയവുമായി കേരളം. 190 റൺസിനാണ് കേരളം ത്രിപുരയെ തകർത്തത്. ആദ്യം ബാറ്റ് ചെയ്ത കേരളം 50 ഓവറിൽ എട്ട് വിക്കറ്റ് നഷ്ടത്തിൽ 257 റൺസെടുത്തു. മറുപടി ബാറ്റിങ്ങിന് ഇറങ്ങിയ ത്രിപുര 67 റൺസിന് എല്ലാവും പുറത്താവുകയായിരുന്നു.

ആദ്യം ബാറ്റ് ചെയ്ത കേരളത്തിന് ഓപ്പണർമാരായ ശ്രേയ പി സിജുവും ശ്രദ്ധ സുമേഷും ചേർന്ന് മികച്ച തുടക്കമാണ് നല്കിയത്. ഇരുവരും ചേർന്ന് ഓപ്പണിങ് വിക്കറ്റിൽ 90 റൺസ് കൂട്ടിച്ചേർത്തു. ശ്രേയ 33ഉം ശ്രദ്ധ 47ഉം റൺസെടുത്തു. സ്കോർ 90ൽ നില്ക്കെ ഇരുവരും പുറത്തായെങ്കിലും തുടർന്നെത്തിയ ശീതൾ വി ജെയുടെ ഉജ്ജ്വല ഇന്നിങ്സ് കേരളത്തിന് തുണയായി. 48 പന്തുകളിൽ 53 റൺസെടുത്ത ശീതൾ റണ്ണൌട്ടാവുകയായിരുന്നു. തുടർന്നെത്തിയ ഇസബെൽ, നിയ നസ്നീൻ, ഗൌരി നന്ദന എന്നിവരുടെ ഇന്നിങ്സുകളും കേരളത്തിന് കരുത്തായി. ഇസബെൽ 27ഉം, നിയ നസ്നീൻ 30ഉം, ഗൌരി നന്ദന 25ഉം റൺസെടുത്തു. ത്രിപുരയ്ക്ക് വേണ്ടി മധുമിത സർക്കാരും ആൻ്റ റാണിയും രണ്ട് വിക്കറ്റുകൾ വീതം വീഴ്ത്തി.

മറുപടി ബാറ്റിങ്ങിന് ഇറങ്ങിയ ത്രിപുര ബാറ്റിങ് നിര കേരള ബൌളിങ്ങിന് മുന്നിൽ തകർന്നടിയുകയായിരുന്നു. 14 റൺസെടുത്ത ഓപ്പണർ അഷ്മിത ദേബ്നാഥ് മാത്രമാണ് രണ്ടക്കം കടന്നത്. 33.5 ഓവറിൽ 67 റൺസിന് ത്രിപുര ഓൾ ഔട്ടായി. കേരളത്തിന് വേണ്ടി ഇസബെൽ, നിയ നസ്നീൻ, ഇഷിത, ഇഷ ജോബിൻ എന്നിവർ രണ്ട് വിക്കറ്റ് വീതം വീഴ്ത്തി.

നാഗ്പൂർ : വിമൻസ് അണ്ടർ 19 ഏകദിന ക്രിക്കറ്റിൽ കേരളത്തിന് ഹിമാചൽപ്രദേശിനോട് തോൽവി. 54 റൺസിനാണ് ഹിമാചൽപ്രദേശ് കേരളത്തെ തോല്പിച്ചത്. ആദ്യം ബാറ്റ് ചെയ്ത ഹിമാചൽപ്രദേശ് 50 ഓവറിൽ ഏഴ് വിക്കറ്റ് നഷ്ടത്തിൽ 253 റൺസെടുത്തു. മറുപടി ബാറ്റിങ്ങിന് ഇറങ്ങിയ കേരളത്തിന് ഏഴ് വിക്കറ്റ് നഷ്ടത്തിൽ 199 റൺസ് മാത്രമാണ് എടുക്കാനായത്.

ടോസ് നേടി ആദ്യം ബാറ്റ് ചെയ്ത ഹിമാചൽപ്രദേശിന് രണ്ടാം ഓവറിൽ തന്നെ ഓപ്പണർ അനാഹിതയുടെ വിക്കറ്റ് നഷ്ടമായി. എന്നാൽ ക്യാപ്റ്റൻ ദേവൻഷി വർമ്മയുടെ ഇന്നിങ്സ് അവർക്ക് ഭേദപ്പെട്ട തുടക്കം നല്കി. 44 റൺസെടുത്ത ദേവൻഷി പുറത്തായപ്പോൾ ഒത്തു ചേർന്ന അഹാന ശർമ്മയുടെ ധന്യ ലക്ഷ്മിയുടെയും കൂട്ടുകെട്ടാണ് ഹിമാചലിന് മികച്ച സ്കോർ സമ്മാനിച്ചത്. നാലാം വിക്കറ്റിൽ ഇരുവരും ചേർന്ന് 116 റൺസ് കൂട്ടിച്ചേർത്തു. അഹാന 76ഉം ധന്യ ലക്ഷ്മി 75ഉം റൺസെടുത്തു.കേരളത്തിന് വേണ്ടി ഇസബെൽ, അനുഷ്ക എന്നിവർ രണ്ട് വിക്കറ്റ് വീതം വീഴ്ത്തി.

മറുപടി ബാറ്റിങ്ങിന് ഇറങ്ങിയ കേരള ബാറ്റിങ് നിരയിൽ 88 റൺസെടുത്ത ഓപ്പണർ ശ്രേയ സിജു മാത്രമാണ് മികച്ച പ്രകടനം കാഴ്ച വച്ചത്. ഉർവ്വശി 21ഉം നിയ നസ്നീൻ 24ഉം റൺസെടുത്തു. മധ്യനിര പൂർണ്ണമായി തകർന്നടിഞ്ഞത് കേരളത്തിന് തിരിച്ചടിയായി. കേരളത്തിൻ്റെ മറുപടി 50 ഓവറിൽ ഏഴ് വിക്കറ്റിന് 199 റൺസിന് അവസാനിച്ചു. മൂന്ന് വിക്കറ്റെടുത്ത ഇമാനി നേഗിയാണ് ഹിമാചൽപ്രദേശ് ബൌളിങ്ങിൽ തിളങ്ങിയത്.