ഈ സീസണിലെ രഞ്ജി ട്രോഫി ഫൈനൽ മാർച്ച് 10 മുതൽ 14 വരെ വാങ്കഡെ സ്റ്റേഡിയത്തിൽ നടക്കുമെന്ന് മുംബൈ ക്രിക്കറ്റ് അസോസിയേഷൻ (എംസിഎ) തിങ്കളാഴ്ച അറിയിച്ചു. 41 തവണ ചാമ്പ്യന്മാരായ മുംബൈ ഫൈനലിൽ എത്തിയതിന് പിന്നാലെയാണ് ഫൈനൽ വേദി തീരുമാനം ആയത്. ഇത് 48-ാം തവണ ആണ് മുംബൈ ഫൈനലിന് യോഗ്യത നേടുന്നത്.
ഏകപക്ഷീയമായ സെമിഫൈനലിൽ തമിഴ്നാടിനെ ഇന്നിംഗ്സിനും 70 റൺസിനും തോൽപ്പിച്ചാണ് മുംബൈ ഫൈനലിൽ പ്രവേശിച്ചത്. നാഗ്പൂരിലെ വിസിഎ ഗ്രൗണ്ടിൽ നടക്കുന്ന രണ്ടാം സെമിഫൈനൽ പോരാട്ടത്തിൽ വിദർഭയും മധ്യപ്രദേശും തമ്മിൽ ഏറ്റുമുട്ടുകയാണ്. ഈ മത്സരത്തിലെ വിജയിയെ ആകും മുംബൈ നേരിടുക.
