ഓസ്ട്രേലിയൻ പര്യടനത്തിനുള്ള ഇന്ത്യൻ ടീമിൽ ഇടം നേടിയ യുവ ബൗളർ നടരാജനെ പ്രകീർത്തിച്ച് മുൻ ഇന്ത്യൻ സ്പിന്നർ ഹർഭജൻ സിംഗ്. നടരാജന് ഇന്ത്യൻ ടീമിൽ അവസരം ലഭിച്ചതിൽ തനിക്ക് ഒരുപാട് സന്തോഷം ഉണ്ടെന്നും തന്നിൽ വിശ്വാസമർപ്പിച്ച് കഠിനാധ്വാനം ചെയ്താൽ എന്തും നടക്കും എന്നതിന്റെ തെളിവാണ് താരത്തിന്റെ പ്രകടനമെന്നും ഹർഭജൻ സിംഗ് പറഞ്ഞു.
ടി20 പരമ്പരയിൽ നടരാജൻ ഇന്ത്യക്ക് വേണ്ടി മികച്ച പ്രകടനമാണ് പുറത്തെടുത്തതെന്നും ഇന്ത്യക്ക് വിക്കറ്റ് ആവശ്യമുള്ള സമയത്തെല്ലാം നടരാജൻ വിക്കറ്റ് വീഴ്ത്തിയിട്ടുണ്ടെന്നും ഹർഭജൻ സിംഗ് പറഞ്ഞു. ഇന്ത്യക്ക് വേണ്ടി ഒരുപാട് മത്സരങ്ങൾ ജയിപ്പിക്കാനുള്ള കഴിവ് താരത്തിന് ഉണ്ടെന്നും താരത്തിന്റെ ആത്മവിശ്വാസം വളരെ മികച്ചതാണെന്നും ഹർഭജൻ സിംഗ് കൂട്ടിച്ചേർത്തു.
ഓസ്ട്രേലിയക്കെതിരായ ആദ്യ 2 ടി20 മത്സരങ്ങളിൽ കളിച്ച നടരാജൻ രണ്ട് മത്സരങ്ങളിൽ നിന്ന് 5 വിക്കറ്റും വീഴ്ത്തിയിരുന്നു. നിലവിൽ ആദ്യ 2 ടി20 മത്സരങ്ങൾ ജയിച്ച ഇന്ത്യ പരമ്പര സ്വന്തമാക്കുകയും ചെയ്തിരുന്നു.
