Tag: Super League Kerala

സൂപ്പർ ക്ലാസിക്കോയിൽ
മലപ്പുറം എഫ്സിയെ മഞ്ചേരി പയ്യനാട് സ്റ്റേഡിയത്തിൽ 2-1 ന് തോൽപ്പിച്ച് കണ്ണൂർ വാരിയേഴ്സ് മഹീന്ദ്ര സൂപ്പർ ലീഗ് കേരളയുടെ പോയൻ്റ് പട്ടികയിൽ ഒന്നാംസ്ഥാനത്ത്. എസിയർ, അഡ്രിയാൻ എന്നിവർ കണ്ണൂരിനായും
ഫസലു റഹ്മാൻ മലപ്പുറത്തിനായും സ്കോർ ചെയ്തു.

ആൾഡലിർ – ജോസബ – സാഞ്ചസ് എന്നീ സ്പാനിഷ് താരങ്ങളെ മധ്യ – മുന്നേറ്റനിരകളിൽ വിന്യസിച്ചാണ് കോച്ച് ജോൺ ഗ്രിഗറി ഇന്നലെ മലപ്പുറത്തെ അണിനിരത്തിയത്. മറുഭാഗത്ത് അൽവാരോ – എസിയർ – അഡ്രിയാൻ സ്പാനിഷ് ത്രയത്തെ മാനുവൽ സാഞ്ചസും കണ്ണൂരിനായി ആദ്യ ഇലവനിൽ കളത്തിലിറക്കി.

നായകൻ അനസ് എടത്തൊടികയെ വാം അപ്പനിടെയേറ്റ പരിക്കിനെ തുടർന്ന് ഇന്നലെ മലപ്പുറത്തിന് കളത്തിലിറക്കാൻ സാധിച്ചില്ല. പകരം
ആൾഡലിർ ആണ് ടീമിനെ നയിച്ചത്.

മൂന്നാം മിനിറ്റിൽ ഫസലു റഹ്മാനിലൂടെ മലപ്പുറമാണ് ആക്രമണത്തിന് തുടക്കം കുറിച്ചത് എങ്കിലും പതിനാലാം മിനിറ്റിൽ കണ്ണൂർ ഗോൾ നേടി. എസിയർ നീക്കി നൽകിയ പന്തിൽ കണ്ണൂർ നായകൻ അഡ്രിയാൻ എതിർ ഗോളിക്ക് അവസരം നൽകാതെ അനായാസം സ്കോർ ചെയ്തു 1-0. മത്സരം കൃത്യം അരമണിക്കൂർ പിന്നിടുമ്പോൾ കണ്ണൂർ ലീഡ് ഇരട്ടിയാക്കി. യുവതാരം മുഹമ്മദ് റിഷാദ് നൽകിയ പന്ത് രണ്ട് പ്രതിരോധനിരക്കാരെ മറികടന്ന് എസിയർ വലയിലേക്ക് അടിച്ചു കയറ്റി 2-0.

ആദ്യ പകുതി അവസാനിക്കാൻ നാല് മിനിറ്റ് ശേഷിക്കെ മലപ്പുറം ഒരു ഗോൾ തിരിച്ചടിച്ചു. പെനാൽറ്റി ബോക്സിൻ്റെ ഇടത് പാർശ്വത്തിൽ നിന്ന് ലോങ് റെയ്ഞ്ചർ പറത്തി
ഫസലു റഹ്മാനാണ് സ്കോർ ചെയ്തത് 2-1. ലീഗിൽ ഫസലുവിൻ്റെ രണ്ടാം ഗോൾ. ആദ്യ പകുതി 2-1 ന് അവസാനിച്ചു.

രണ്ടാം പകുതിയിൽ മലപ്പുറം കൂടുതൽ കരുത്തോടെ ആക്രമണത്തിനിറങ്ങി. അൻപത്തിരണ്ടാം മിനിറ്റിൽ സാഞ്ചസിന് മികച്ചൊരു അവസരം ലഭിച്ചെങ്കിലും ഹെഡ്ഡർ പുറത്തേക്ക് പോയി. അറുപത്തിയഞ്ചാം മിനിറ്റിൽ ബ്രസീൽ താരം ബാർബോസ മലപ്പുറത്തിനായി ലക്ഷ്യം കണ്ടെങ്കിലും റഫറി സുരേഷ് ദേവരാജ് ഓഫ്സൈഡ് വിധിച്ചു. കളിക്കാരെ നിരന്തരം മാറ്റി പരീക്ഷിച്ച് ഇരു ടീമുകളും രണ്ടാം പകുതിയിൽ ഗോളിനായി ശ്രമിച്ചെങ്കിലും വലയനങ്ങിയില്ല. തുടർച്ചയായി മൂന്ന് മത്സരം ഹോം ഗ്രൗണ്ടായ പയ്യനാട് സ്റ്റേഡിയത്തിൽ കളിച്ചെങ്കിലും ഇവിടെ ഒരു വിജയം നേടാൻ മലപ്പുറത്തിന് ഇതുവരെ കഴിഞ്ഞിട്ടില്ല.

നാല് കളികളിൽ എട്ട് പോയൻ്റുമായി കണ്ണൂർ പട്ടികയിൽ ഒന്നാമത് നിൽക്കുമ്പോൾ ഇത്രയും കളികളിൽ നാല് പോയൻ്റുള്ള മലപ്പുറം നാലാമതാണ്.

സൂപ്പർ ലീഗ് കേരളയിലെ ആദ്യ മലബാർ ഡർബിയിൽ കാലിക്കറ്റ് എഫ് സി സ്വന്താമാക്കി. ഇന്ന് മലപ്പുറം മഞ്ചേരിയിൽ നടന്ന മത്സരത്തിൽ എതിരില്ലാത്ത മൂന്ന് ഗോളുകൾക്ക് ആണ് വിജയിച്ചത്. കാലിക്കറ്റ് എഫ് സിയുടെ സീസണിലെ ആദ്യ വിജയമാണിത്. ഇരട്ട ഗോളുമായി ഗനി ആണ് കാലിക്കറ്റിന്റെ ഹീറോ ആയത്.

മത്സരത്തിൽ 22ആം മിനുട്ടിൽ മലയാളി താരം ഗനി നിഗം ആണ് കാലിക്കറ്റിന് ലീഡ് നൽകിയത്. നല്ല ചിപ്പ് ഫിനിഷിലൂടെ ആയിരുന്നു ഗനിയുടെ ഗോൾ. ആദ്യ പകുതിയിൽ 1-0ന്റെ ലീഡ് നിലനിർത്താൻ കാലിക്കറ്റിനായി. രണ്ടാം പകുതിയിൽ 61ആം മിനുട്ടിൽ കാലിക്കറ്റ് ലീഡ് ഇരട്ടിയാക്കി.

ഡിഫൻസിലെ ഒരു അബദ്ധം മുതലെടുത്ത് ബെൽഫോർട്ട് പന്ത് അനായാസം ലക്ഷ്യത്തിൽ എത്തിച്ചു. സ്കോർ 2-0. മത്സരത്തിൽ ഇഞ്ച്വറി ടൈമിൽ ഗനി വീണ്ടും ഗോൾ നേടിയതോടെ കാലിക്കറ്റ് ജയം ഉറപ്പിച്ചു.

ഈ വിജയത്തോടെ കാലിക്കറ്റിന് 2 മത്സരങ്ങളിൽ നിന്ന് 4 പോയിന്റ് ആയി. മലപ്പുറത്തിന് 3 പോയിന്റുമാണുള്ളത്.

കേരള ഫുട്ബോളിലെ മഹത്തായ രണ്ട് സാമ്രാജ്യങ്ങളാണ് കോഴിക്കോടും മലപ്പുറവും. ആരാധകക്കരുത്തിലും താരസമ്പത്തിലും ഒപ്പത്തിനൊപ്പം നിൽക്കുന്ന രണ്ട് പ്രദേശങ്ങൾ. മഹീന്ദ്ര സൂപ്പർ ലീഗ്‌ കേരളയിൽ ഇരുദേശങ്ങളെയും പ്രതിനിധീകരിക്കുന്നത്   മലപ്പുറം എഫ്സിയും കലിക്കറ്റ്‌ എഫ്‌സിയും. ഇവർ തമ്മിലുള്ള മലബാർ ഡർബിക്ക്‌ ഇന്ന് മഞ്ചേരി പയ്യനാട്‌ സ്‌റ്റേഡിയം സാക്ഷിയാകും.

രാത്രി ഏഴിനാണ്‌ പെരുംപോരാട്ടത്തിൻ്റെ കിക്കോഫ്. മൈതാനത്തെ  വീറിനൊപ്പം ഗ്യാലറിയിലും വാശിനുരയുമെന്നതാണ് മത്സരത്തെ ശ്രദ്ധേയമാക്കുന്നത്, ആരാധകരെ ത്രസിപ്പിക്കുന്നത്. 

ഇരുടീമുകൾക്കും വമ്പൻ ഫാൻ ബെയ്സുള്ളതിനാൽ ​ഗാലറി നിറഞ്ഞൊഴുകും. ടിക്കറ്റുകളുടെ വിൽപ്പന ഓൺലൈനിലും ഓഫ് ലൈനിലും തകർക്കുകയാണ്. 

ഹോം ടീമായ മലപ്പുറം എഫ്സിയുടെ ആരാധക സംഘം ‘അൾട്രാസ്‌ ’   മത്സരത്തിനായി വിപുലമായ ഒരുക്കങ്ങളാണ്‌ നടത്തുന്നത്‌. സർപ്രൈസ് ആഘോഷങ്ങളും ഗ്യാലറിയിൽ നടക്കുമെന്ന് ഉറപ്പ്. കാണികളെ എത്തിക്കാൻ വിവിധ ഭാഗങ്ങളിൽ നിന്ന് വാഹനസൗകര്യം ഉൾപ്പെടെ  ഏർപ്പെടുത്തിയിട്ടുണ്ട്‌ അൾട്രാസ്.  

മലപ്പുറം എഫ്‌സി സ്വന്തം തട്ടകത്തിൽ ആദ്യ കളിക്കിറങ്ങുമ്പോൾ അതിനെ അവിസ്മരണീയമാക്കാനാണ് ‘ അൾട്രാസ്‌ ‘ പദ്ധതിയിടുന്നത്. 

കലൂർ സ്‌റ്റേഡിയത്തിൽ നടന്ന മഹീന്ദ്ര സൂപ്പർ ലീഗ് കേരളയുടെ ഉദ്‌ഘാടന മത്സത്തിൽ മലപ്പുറവും കൊച്ചിയും ഏറ്റുമുട്ടിയപ്പോൾ സാക്ഷിയാവാനായി പതിനായിരക്കണക്കിന് സാധാരണക്കാർ പോലും മലപ്പുറത്ത് നിന്ന് കൊച്ചിയിൽ എത്തി. അവർ കൂടുതൽ കരുത്തോടെ ഇന്ന് പയ്യനാട് ഉണ്ടാവും. ‘ബീക്കൺസ്‌ ബ്രിഗേഡ്‌ ’ എന്ന പേരിൽ അറിയപ്പെടുന്ന കാലിക്കറ്റ് എഫ്സിയുടെ ആരാധകപ്പടയും ചില്ലറക്കാരല്ല. അവരും വനിതാ ആരാധകരെ ഉൾപ്പടെ ആയിരങ്ങളെ ഗ്യാലറിയിൽ എത്തിക്കും.

 വമ്പും കൊമ്പുമയി ഇറങ്ങിയ ഫോഴ്‌സ കൊച്ചിയെ അവരുടെ തട്ടകത്തിൽ രണ്ടുഗോളുകൾക്ക് കശാപ്പ് ചെയ്താണ് മലപ്പുറം എഫ്സി സൂപ്പർ ലീഗ് കേരളയിൽ പൂജകുറിച്ചത്. രണ്ടാം മത്സരവും ജയിച്ച് പോയൻ്റ് പട്ടികയിൽ പോൾ പോസിഷനിൽ തുടരാനാവും ഇന്ത്യൻ താരം അനസ് എടത്തൊടിക നയിക്കുന്ന മലപ്പുറംപടയുടെ ലക്ഷ്യം.

ഇംഗ്ലീഷ് കോച്ച് ജോൺ ഗ്രിഗറി തന്ത്രങ്ങൾ ഒരുക്കുന്ന മലപ്പുറം എഫ്‌സിയിൽ നാട്ടുകാർക്ക് പ്രിയങ്കരായ മിഥുൻ, ഫസലു, റിസ്വാൻ അലി, അജയ്, ജാസിം തുടങ്ങിയവർ ബൂട്ടുകെട്ടുന്നു. ഒപ്പം ഐ ലീഗ് സ്റ്റാർ അലക്സ് സാഞ്ചസ്, ബാർബോസ തുടങ്ങിയ വിദേശ താരങ്ങളും പറന്നുകളിക്കും. 

യൂറോപ്യൻ ഫുട്ബോളിൻ്റെ പരിചയസമ്പത്തുള്ള ഇയാൻ ആൻഡ്രൂ ഗിലാൻ ഒരുക്കുന്ന കാലിക്കറ്റ് എഫ്സി ആദ്യമത്സരത്തിൽ തിരുവനന്തപുരം കൊമ്പൻസിനോട് 1-1 ന് സ്വന്തം ഗ്രൗണ്ടിൽ സമനില  വഴങ്ങിയിരുന്നു. കിരീട നേട്ടത്തിലേക്ക് കണ്ണെറിയുന്ന മലബാറിൻ്റെ തലസ്ഥാന നഗരിയിൽ നിന്നുള്ള ടീമിന് രണ്ടാം മത്സരം ജയിക്കത്തെ വയ്യ. അതിനാൽ പയ്യനാട്ടെ യുദ്ധം ജയിക്കാൻ എല്ലാ പടക്കോപ്പുകളും അവർ പുറത്തെടുക്കും. കേരളത്തിൻ്റെ സന്തോഷ് ട്രോഫി നായകൻ ജിജോ ജോസഫ് നായകൻ്റെ ആം ബാൻഡ് അണിയുന്ന ടീമിൽ വിശാൽ, ഹക്കു, ഗനി, ബ്രിട്ടോ, അഷ്റഫ് തുടങ്ങിയ നാട്ടുകരുത്തും പടവെട്ടും. വിദേശതാരങ്ങൾക്കൊപ്പം ഇന്ത്യൻ ഫുട്ബോളിൻ്റെ നഴ്സറിയായ നോർത്ത് ഈസ്റ്റ് ബൂട്ടുകളും ടീമിൻ്റെ വജ്രായുധങ്ങളാണ്.  

ഒളിമ്പ്യൻ റഹ്മാൻ, എൻ എം നജീബ്, പ്രേംനാഥ് ഫിലിപ്പ്, സേതുമാധവൻ തുടങ്ങിയ ഇതിഹാസ താരങ്ങളുടെ ഓർമ്മകൾ കരുത്താക്കി കാലിക്കറ്റ് എഫ്സി പടക്കളത്തിൽ ഇറങ്ങുമ്പോൾ മലപ്പുറം എഫ്സിക്കുമുണ്ട് അതിനൊപ്പം നിൽക്കുന്ന പാരമ്പര്യം. ഇന്ത്യക്കും പാക്കിസ്ഥാനും കളിച്ച മൊയ്തീൻ കുട്ടിമാർ, എം ആർ സി അബൂബക്കറും കൊറ്റനും കുഞ്ഞനും. ഒപ്പം ശറഫലിയും ജാബിറും നയിച്ച പോരാട്ടങ്ങളും മലപ്പുറം എഫ്സിക്കും കരുത്താവും.  ഭൂത – വർത്തമാന – ഭാവി ജീവിതങ്ങൾ ഫുട്ബോളിൽ കോർത്തുവെച്ച രണ്ടു ദേശങ്ങൾ നാളെ ഉത്രാടനാളിൽ മുഖാമുഖം നിൽക്കുമ്പോൾ അതിനായി പ്രകൃതി പോലും മഴമാറ്റി വെളിച്ചം പ്രസരിപ്പിച്ച് കാത്തിരിക്കുന്നു. ഒപ്പം ആയിരക്കണക്കിന് ആരാധകരും. 

…..

പേടിഎംവഴിയാണ്‌ മത്സരത്തിൻ്റെ ടിക്കറ്റ് ബുക്കിങ്‌. മത്സര ദിവസം സ്‌റ്റേഡിയത്തിലും ടിക്കറ്റ്‌ ലഭ്യമാണ്.

മത്സരങ്ങളുടെ തത്സമയ സംപ്രേഷണം സ്റ്റാർ സ്പോർട്സ് 1ൽ, വെബ്സ്ട്രീമിങ് ഡിസ്‌നി പ്ലസ് ഹോട്ട് സ്റ്റാറിലും ലഭിക്കും