Tag: South Korea

ഇന്ത്യന്‍ പുരുഷ ഹോക്കി ടീമിന്റെ വിജയക്കുതിപ്പിനു തടയിടുവാന്‍ കൊറിയയ്ക്കായില്ലെങ്കിലും മൂന്ന് വട്ടം ഗോള്‍ വല ചലിപ്പിച്ച് ഇന്ത്യയുടെ പ്രതിരോധത്തിലെ പിഴവുകള്‍ തുറന്ന് കാട്ടി ദക്ഷിണ കൊറിയ പൊരുതി കീഴടങ്ങി. 5-3 നു ജയം സ്വന്തമാക്കി ഇന്ത്യ പകുതി സമയത്ത് 3-0നു ലീഡ് ചെയ്യുകയായിരുന്നു. ആദ്യ പകുതിയ്ക്ക് ശേഷം തുടരെ രണ്ട് ഗോളുകള്‍ മടക്കി കൊറിയ ഇന്ത്യയെ വിറപ്പിച്ചുവെങ്കിലും അവസാന മിനുട്ടുകളില്‍ രണ്ട് ഗോള്‍ കൂടി നേടി ഇന്ത്യ അപ്രാപ്യമായ ലീഡെടുക്കുകയായിരുന്നു. അവസാന മിനുട്ടില്‍ കൊറിയ ഒരു ഗോള്‍ കൂടി മടക്കിയെങ്കിലും ഇന്ത്യയുടെ വിജയക്കുതിപ്പിനു വിലങ്ങ് തടിയാകുവാന്‍ ടീമിനായില്ല.

ആദ്യ മിനുട്ടില്‍ തന്നെ രൂപീന്ദര്‍ ഇന്ത്യയെ മുന്നിലെത്തിക്കുകയായിരുന്നു. നാലാം മിനുട്ടില്‍ ചിംഗ്ലെന്‍സാനയും 15ാം മിനുട്ടില്‍ ലളിതും നേടിയ ഗോളുകളില്‍ ഇന്ത്യ അജയമായ ലീഡ് നേടുകയായിരുന്നു. എന്നാല്‍ 33, 35 മിനുട്ടില്‍ മന്‍ജായേ കൊറിയയുടെ ഗോളുകള്‍ നേടിയതോടെ മത്സരം ആവേശകരമായി.

ഇരു ടീമുകളും ഗോള്‍മുഖത്ത് നിരന്തരമായ ആക്രമണങ്ങള്‍ അഴിച്ചുവിട്ടപ്പോള്‍ മത്സരം കൂടുതല്‍ ആവേശകരമായി. മന്‍പ്രീത്(49), ആകാശ്ദീപ്(55) എന്നിവര്‍ നേടിയ ഗോളുകളാണ് മത്സരം ഇന്ത്യയുടെ പക്ഷത്തേക്ക് മാറ്റിയത്. ജോംഗ് യുന്‍ 59ാം മിനുട്ടില്‍ കൊറിയയുടെ മൂന്നാം ഗോള്‍ നേടി.

അവസാന ഏഴ് മിനുട്ടിനുള്ള മൂന്ന് ഗോളുകള്‍ നേടി ദക്ഷിണ കൊറിയയെ വീഴ്ത്തി ഇന്ത്യന്‍ ഹോക്കി വനിത ടീം. 4-1 എന്ന സ്കോറിനാണ് ദക്ഷിണ കൊറിയയെ ഇന്ത്യ വീഴ്ത്തിയത്. 16ാം മിനുട്ടില്‍ നവനീത് ഇന്ത്യയ്ക്ക് ലീഡ് നേടിക്കൊടുത്തുവെങ്കിലും 20ാം മിനുട്ടില്‍ യൂറിമിലൂടെ കൊറിയ സമനില ഗോള്‍ കണ്ടെത്തി. പകുതി സമയത്ത് ഇരു ടീമുകളും 1-1നു സമനില പാലിക്കുകയായിരുന്നു.

രണ്ടാം പകുതിയിലും ഗോളുകള്‍ പിറക്കാതിരുന്നപ്പോള്‍ മത്സരം സമനിലയിലേക്ക് നീങ്ങുമെന്നാണ് കരുതിയതെങ്കിലും അവസാന മിനുട്ടുകളില്‍ ഗുര്‍ജിത്ത് (54, 55) ദക്ഷിണ കൊറിയയെ ഞെട്ടിക്കുകയായിരുന്നു. തൊട്ടടുത്ത മിനുട്ടില്‍ വന്ദന ടീമിന്റെ നാലാം ഗോള്‍ കൂടി നേടിയതോടെ ഇന്ത്യ തങ്ങളുടെ മൂന്നാം ജയം സ്വന്തമാക്കി.