തിരുവനന്തപുരം : കേരള ക്രിക്കറ്റ് ലീഗിൽ (കെ.സി.എൽ) വീണ്ടും നാല് വിക്കറ്റ് നേട്ടവുമായി സിബിൻ ഗിരീഷ്. നിർണ്ണായക മത്സരത്തിൽ ആലപ്പി റിപ്പിൾസിനെതിരെ രണ്ടാം തവണയാണ് സിബിൻ ഗിരീഷ് നാല് വിക്കറ്റ് നേട്ടം സ്വന്തമാക്കിയത്. നാല് ഓവറിൽ 16 റൺസ് മാത്രം വഴങ്ങിയാണ് സിബിൻ ഈ മികച്ച പ്രകടനം കാഴ്ചവെച്ചത്. മധ്യനിരയിൽ നിലയുറപ്പിക്കാൻ ശ്രമിച്ച മുഹമ്മദ് കൈഫ്,അക്ഷയ്.ടി.കെ എന്നിവരുടെ വിക്കറ്റുകളും, വാലറ്റത്തെ മുഹമ്മദ് ഇനാൻ, മുഹമ്മദ് നാസിൽ എന്നിവരുടെ വിക്കറ്റുകളും സിബിൻ നേടി. ഈ പ്രകടനത്തോടെ കെ.സി.എൽ. വിക്കറ്റ് വേട്ടയിൽ സിബിൻ മൂന്നാം സ്ഥാനത്തെത്തി.
തൃശൂർ കോട്ടൂർ സ്വദേശികളായ ഗിരീഷ്-രമണി ദമ്പതികളുടെ മകനാണ് 26കാരനായ സിബിൻ ഗിരീഷ്. വലം കൈയ്യൻ ഓൾറൗണ്ടറായ സിബിൻ ടോപ്പ് ഓർഡറിലും മധ്യനിരയിലും മികച്ച പ്രകടനം കാഴ്ചവച്ചിട്ടുണ്ട്. മീഡിയം ഫാസ്റ്റ് ബൗളറായ സിബിൻ എൻ.എസ്.കെ. ട്രോഫിയിൽ മലപ്പുറത്തെ പ്രതിനിധീകരിച്ച് മികച്ച പ്രകടനം കാഴ്ചവച്ചിരുന്നു.
