Tag: Serie A

ഇറ്റാലിയൻ സീരി എയിൽ ലീഗിൽ നിന്നു തന്നെ അടുത്ത സീസണിൽ ചാമ്പ്യൻസ് ലീഗ് യോഗ്യത നേടാനുള്ള എ.സി മിലാൻ നീക്കങ്ങൾക്ക് തിരിച്ചടി. കഴിഞ്ഞ അഞ്ചു മത്സരങ്ങളിൽ നിന്നു ഒന്നിൽ മാത്രം ജയിക്കാൻ ആയ മിലാൻ ഇന്ന് തരം താഴ്ത്തൽ ഭീഷണി നേരിടുന്ന സ്പെസിയയോട് തോറ്റു. ചാമ്പ്യൻസ് ലീഗ് ആദ്യ പാദ സെമിയിൽ ഇന്ററിനോടും തോറ്റ മിലാന് ഇത് കനത്ത തിരിച്ചടിയാണ്. പന്ത് കൈവശം വക്കുന്നതിൽ മിലാൻ മുൻതൂക്കം കണ്ടു എങ്കിലും വലിയ മുന്നേറ്റം ഒന്നും അവർ ഉണ്ടാക്കിയില്ല.

രണ്ടാം പകുതിയിൽ 75 മത്തെ മിനിറ്റിൽ വിസിനെസ്കിയും 85 മത്തെ മിനിറ്റിൽ സാൽവതോർ എസ്പോസിറ്റയും നേടിയ ഗോളുകൾ ആണ് സ്പെസിയക്ക് വലിയ ജയം സമ്മാനിച്ചത്. മാർച്ചിന് ശേഷം അവർ നേടുന്ന ആദ്യ ജയം ആണ് ഇത്. നിലവിൽ 18 സ്ഥാനത്ത് ആണ് അവർ. നിലവിൽ അഞ്ചാം സ്ഥാനത്ത് ഉള്ള മിലാന് വരുന്ന മൂന്നു മത്സരങ്ങൾ വളരെ നിർണായകമാണ്. മത്സര ശേഷം മിലാൻ താരങ്ങളെയും പരിശീലക ടീമിനെയും നിർത്തി അവരോട് സംസാരിക്കുന്ന മിലാൻ അൾട്രാസിനെയും കാണാൻ ആയി.

ഇറ്റാലിയൻ സീരി എയിൽ മോൻസയോട് എതിരില്ലാത്ത ഒരു ഗോളിന് പരാജയപ്പെട്ടു ഇന്റർ മിലാൻ. ഇന്റർ ആധിപത്യം കണ്ട മത്സരത്തിൽ 25 ഷോട്ടുകൾ ആണ് അവർ ഉതിർത്തത്. എന്നാൽ മോൻസ പ്രതിരോധം ഇന്ററിന് മുന്നിൽ കീഴടങ്ങിയില്ല. ജയത്തോടെ മോൻസ ലീഗിൽ പന്ത്രണ്ടാം സ്ഥാനത്തേക്ക് കയറിയപ്പോൾ ചാമ്പ്യൻസ് ലീഗ് യോഗ്യതക്ക് പുറത്ത് അഞ്ചാം സ്ഥാനത്ത് ആണ് ഇന്റർ. ഗോൾ രഹിതമായ വിരസമായ ആദ്യ പകുതിയിലെ പ്രകടനം തന്നെയാണ് ഇന്റർ രണ്ടാം പകുതിയിലും തുടർന്നത്.

ഇടക്ക് മാർട്ടിനസ്, ലുകാക്കു എന്നിവരുടെ ശ്രമങ്ങൾ ഫലവും കണ്ടില്ല. 78 മത്തെ മിനിറ്റിൽ മുൻ ഇന്റർ യുവതാരം ലൂക കാൽഡിറോള പാട്രിക് സിയുരയുടെ കോർണറിൽ നിന്നു ഹെഡറിലൂടെ ഗോൾ നേടി സാൻ സിറോയെ ഞെട്ടിക്കുക ആയിരുന്നു.ഇന്ററിന് എതിരെ ജനുവരിയിലും താരം ഗോൾ നേടിയിരുന്നു. ജയത്തോടെ തങ്ങളുടെ ആദ്യ സീരി എ സീസണിൽ തന്നെ അടുത്ത സീസണിലും തങ്ങൾ ഇറ്റാലിയൻ ഒന്നാം ഡിവിഷനിൽ ഉണ്ടാവും എന്നു മോൻസ ഉറപ്പിച്ചു. പരാജയം മറന്നു ചാമ്പ്യൻസ് ലീഗ് രണ്ടാം പാദ ക്വാർട്ടർ ഫൈനലിൽ ബെൻഫിക്കയെ നേരിടുന്നതിൽ ആവും ഇനി ഇന്ററിന്റെ ശ്രദ്ധ.

ഇറ്റാലിയൻ സീരി എയിൽ പത്താം സ്ഥാനക്കാർ ആയ ഫിയറന്റീനയെ ഒന്നിനെതിരെ രണ്ടു ഗോളുകൾക്ക് മറികടന്നു എ.സി മിലാൻ. ജയത്തോടെ ഒന്നാം സ്ഥാനക്കാർ ആയ നാപോളിയെക്കാൾ 8 പോയിന്റുകൾ പിന്നിൽ രണ്ടാം സ്ഥാനത്തേക്ക് ഉയരാൻ മിലാനിന് ആയി. മത്സരത്തിൽ മികച്ച തുടക്കം ലഭിച്ച മിലാൻ രണ്ടാം മിനിറ്റിൽ തന്നെ മുന്നിലെത്തി. ഒളിവർ ജിറൂദിന്റെ പാസിൽ നിന്നു റാഫേൽ ലിയോ ആണ് മിലാനു മത്സരത്തിൽ മുൻതൂക്കം നൽകിയത്. തിരിച്ചടിക്കാൻ ഉടൻ തന്നെ ഫിയറന്റീന ശ്രമം ഉണ്ടായി. എന്നാൽ എട്ടാം മിനിറ്റിൽ ക്രിസ്റ്റിയാനോ ബിരാഗിയുടെ ഷോട്ട് പക്ഷെ പോസ്റ്റിൽ തട്ടി മടങ്ങി.

28 മത്തെ മിനിറ്റിൽ ഫിയറന്റീന സമനില ഗോൾ കണ്ടത്തി. ജോനാഥൻ ഇകോനയുടെ പാസിൽ നിന്നു ചെക് താരം അന്റോണിൻ ബരാക് ഫിയറന്റീനയെ മത്സരത്തിൽ സമനില സമ്മാനിച്ചു. രണ്ടാം പകുതിയിൽ വിജയഗോളിന് ആയി ഇരു ടീമുകളും പൊരുതി. പലപ്പോഴും മത്സരം പരുക്കനും ആയി. ഒടുവിൽ ഇഞ്ച്വറി സമയത്ത് മിലാനെ ഭാഗ്യം തുണച്ചു. 91 മത്തെ മിനിറ്റിൽ പകരക്കാരനായി ഇറങ്ങിയ ആസ്റ്റർ വ്രാങ്കിസിന്റെ ക്രോസ് ക്ലിയർ ചെയ്യാനുള്ള ഫിയറന്റീന പ്രതിരോധതാരം നികോള മിലൻകോവിചിന്റെ ശ്രമം സ്വന്തം പോസ്റ്റിൽ പതിക്കുക ആയിരുന്നു. റെബിച് ഇതിനു മുമ്പ് താരത്തെ ഫൗൾ ചെയ്തോ എന്നു വാർ ദീർഘസമയം പരിശോധിച്ചു എങ്കിലും ഒടുവിൽ ഗോൾ അനുവദിക്കുക ആയിരുന്നു. ഫിയറന്റീനയിൽ നിന്നു ജയം തട്ടിയെടുക്കുക ആയിരുന്നു മിലാൻ.