ബാഡ്മിന്റൺ ലോക ചാമ്പ്യന്ഷിപ്പ് സെമിയിൽ കടന്ന് ഇന്ത്യയുടെ സാത്വിക്സായിരാജ്-ചിരാഗ് ഷെട്ടി കൂട്ടുകെട്ട്. ഇന്ന് നടന്ന ക്വാര്ട്ടര് ഫൈനലില് ജപ്പാന്റെ ഹോകി – കോബായാഷി കൂട്ടുകെട്ടിനെ മൂന്ന് ഗെയിം പോരാട്ടത്തിലാണ് ഇന്ത്യന് ജോഡി പരാജയപ്പെടുത്തിയത്. ലോക റാങ്കിംഗിൽ മൂന്നാം സ്ഥാനക്കാരാണ് ജപ്പാന് താരങ്ങള്. സ്കോര്: 24-22, 15-21, 21-14. നിലവിലെ ലോക ചാമ്പ്യന്മാരാണ് ഈ കൂട്ടുകെട്ട്. ഇതോടെ ഇന്ത്യയ്ക്കായി ബാഡ്മിന്റൺ ലോക ചാമ്പ്യന്ഷിപ്പിൽ മെഡൽ നേടുന്ന ആദ്യ ഡബിള്സ് ജോഡിയായി ഇവര് മാറി.
അതേ സമയം പുരുഷ സിംഗിള്സിൽ എച്ച് എസ് പ്രണോയ് ക്വാര്ട്ടറിൽ പൊരുതി വീണു. ആദ്യ ഗെയിം പ്രണോയ് 21-19ന് നേടിയെങ്കിലും രണ്ടാം ഗെയിമിൽ ചൈനീസ് താരം പ്രണോയിയെ നിലം തൊടീച്ചില്ല. മൂന്നാം ഗെയിമിൽ പൊരുതി നോക്കിയെങ്കിലും 65 മിനുട്ട് നീണ്ട പോരാട്ടത്തിനൊടുവിൽ പ്രണോയ്ക്ക് കാലിടറി. സ്കോര്: 21-19, 6-21, 18-21.
