Tag: PSL

ബയോ ബബിളില്‍ കൊറോണ കേസുകള്‍ വര്‍ദ്ധിച്ചതിനെത്തുടര്‍ന്ന് മാറ്റിവെച്ച പാക്കിസ്ഥാന്‍ സൂപ്പര്‍ ലീഗ് ജൂണില്‍ ആരംഭിയ്ക്കും എന്ന് അറിയിച്ച് പിസിബി. മത്സരങ്ങളെല്ലാം കറാച്ചിയില്‍ ആവും നടക്കുക എന്നും പാക്കിസ്ഥാന്‍ ക്രിക്കറ്റ് ബോര്‍ഡ്. ഫ്രാഞ്ചൈസികളും ഗവേണിംഗ് കൗണ്‍സിലുമായുള്ള ചര്‍ച്ചയ്ക്ക് ശേഷമാണ് ബോര്‍ഡ് ഈ തീരുമാനത്തിലെത്തിയത്.

ഏപ്രിലില്‍ പാക്കിസ്ഥാന്‍ ദക്ഷിണാഫ്രിക്കയില്‍ ക്രിക്കറ്റ് കളിക്കാനെത്തുന്നതിനാല്‍ തന്നെ ജൂണില്‍ മാത്രമാണ് ചെറിയൊരു ഇടവേള പിഎസ്എലിനായി ലഭ്യമായിട്ടുള്ളത്. ജൂണ്‍ കഴിഞ്ഞ് അധികം വൈകാതെ പാക്കിസ്ഥാന്‍ ഇംഗ്ലണ്ടിലേക്ക് യാത്രയാകും. ജൂണില്‍ എത്ര വിദേശ താരങ്ങള്‍ പിഎസ്എലില്‍ പങ്കെടുക്കുവാനുണ്ടാകുമെന്നതില്‍ വലിയ വ്യക്തതയില്ല.

20 മത്സരങ്ങളാണ് ടൂര്‍ണ്ണമെന്റില്‍ ഇനി അവശേഷിക്കുന്നത്. ദക്ഷിണാഫ്രിക്കയില്‍ നിന്ന് സിംബാബ്‍വേ പര്യടനം കഴിഞ്ഞ് മേയ് 13ന് എത്തുന്ന ടീം ജൂണ്‍ 26ന് ഇംഗ്ലണ്ടിലേക്ക് യാത്രയാകും. ഈ കാലയളവിനുള്ളില്‍ ആണ് പിഎസ്എല്‍ നടത്തുവാനുള്ള ജാലകം ബോര്‍ഡ് തിരയുന്നത്.

ഫവദ് അഹമ്മദിന്റെ കോവിഡ് സ്ഥിരീകരണത്തിന് ശേഷം പാക്കിസ്ഥാന്‍ സൂപ്പര്‍ ലീഗില്‍ നടത്തിയ കൊറോണ പരിശോധനയില്‍ മൂന്ന് കേസുകള്‍ കൂടി റിപ്പോര്‍ട്ട് ചെയ്തു. 244 ആളുകളില്‍ ആണ് പാക്കിസ്ഥാന്‍ ക്രിക്കറ്റ് ബോര്‍ഡ് ടെസ്റ്റുകള്‍ നടത്തിയതില്‍ ഇതില്‍ രണ്ട് വിദേശ താരങ്ങള്‍ ഉള്‍പ്പെടെ മൂന്ന് പേര്‍ക്ക് കൊറോണ സ്ഥിരീകരിക്കുകയായിരുന്നു.

ഒരു പ്രാദേശിക സപ്പോര്‍ട്ട് സ്റ്റാഫിനും കൊറോണ റിപ്പോര്‍ട്ട് ചെയ്തിട്ടുണ്ട്. മൂന്ന് പേരെയും പ്രത്യേകം ഹോട്ടല്‍ നിലകളിലായാണ് ഇപ്പോള്‍ പാര്‍പ്പിച്ചിരിക്കുന്നത്. ഇന്ന് പാക്കിസ്ഥാന്‍ സമയം ഏഴ് മണിക്ക് നടക്കുവാനുള്ള മത്സരം നേരത്തെ നിശ്ചയിച്ച പ്രകാരം തന്നെ നടക്കുമെന്നാണ് അറിയുന്നത്.