ലയാം ഡെലാപിന് പരിക്കേറ്റതിനെ തുടർന്ന് നിക്കോളാസ് ജാക്സണെ ബയേൺ മ്യൂണിക്കിന് ലോണിൽ നൽകാനുള്ള നീക്കം ചെൽസി റദ്ദാക്കി. ഉടൻ തന്നെ ലണ്ടനിലേക്ക് മടങ്ങാൻ ജാക്സണിനോട് ക്ലബ്ബ് ആവശ്യപ്പെട്ടു. അടുത്തിടെ ഫുൾഹാമിനെതിരായ പ്രീമിയർ ലീഗ് മത്സരത്തിൽ ഹാംസ്ട്രിംഗിന് പരിക്കേറ്റ ഡെലാപ്പിന് എട്ട് ആഴ്ച വരെ വിശ്രമം വേണ്ടിവരുമെന്നാണ് സൂചന.
ഇതോടെ പരിശീലകൻ എൻസോ മാരെസ്കയുടെ കീഴിൽ ചെൽസിക്ക് അവരുടെ മുന്നേറ്റനിരയെക്കുറിച്ച് പുനരാലോചിക്കേണ്ടിവന്നു.
ഡെലാപ്പ് പുറത്തായതോടെ, സമ്മർ സൈനിംഗായ ജോവോ പെഡ്രോ മാത്രമാണ് സീനിയർ സ്ട്രൈക്കറായി ടീമിലുള്ളത്. ഈ സാഹചര്യത്തിൽ ടീമിൻ്റെ ആവശ്യങ്ങൾ നിറവേറ്റാൻ ജാക്സണിനെ നിലനിർത്തേണ്ടത് അത്യാവശ്യമാണെന്ന് ചെൽസി തീരുമാനിക്കുകയായിരുന്നു.
80 മില്യൺ യൂറോയുടെ ലോൺ കരാറിൽ ജാക്സണെ സ്വന്തമാക്കാൻ ബയേൺ മ്യൂണിക്ക് നേരത്തെ ധാരണയിലെത്തിയിരുന്നു. എന്നാൽ ഡെലാപിന് പരിക്കേറ്റതോടെ ചെൽസിയുടെ മുൻഗണനകൾ പെട്ടെന്ന് മാറി. ആഭ്യന്തര, യൂറോപ്യൻ മത്സരങ്ങളിൽ ജാക്സണിൻ്റെ സാന്നിധ്യം അനിവാര്യമാണെന്ന് ക്ലബ്ബ് വ്യക്തമാക്കി.
