Tag: Mohammad Shami

നാനാത്വത്തില്‍ ഏകത്വം, ഇന്ത്യയുടെ പേസ് ബൗളിംഗിനെക്കുറിച്ച് മുഹമ്മദ് ഷമി പറഞ്ഞത് ഒറ്റ വാക്കില്‍ വിശേഷിപ്പിക്കുകയാണെങ്കില്‍ ഇപ്രകാരം വിശേഷിപ്പിക്കാം. ഇന്ത്യയുടെ പേസ് ബൗളിംഗ് നിര വൈവിധ്യമാര്‍ന്നവരാല്‍ സമ്പന്നമാണെങ്കിലും അവരുടെ ലക്ഷ്യം ഒന്നാണെന്നും ആ ലക്ഷ്യത്തിലേക്ക് ഒറ്റക്കെട്ടായി പൊരുതുന്നവരാണെന്നും പറഞ്ഞ് ഇന്ത്യന്‍ സീനിയര്‍ പേസര്‍ മുഹമ്മദ് ഷമി. ശക്തരായ ഓസ്ട്രേലിയയെ വെല്ലുവിളിക്കുവാന്‍ ഈ വൈവിധ്യത്തിലെ ഏകത ടീമിനെ സഹായിക്കുമെന്നും മുഹമ്മദ് ഷമി വ്യക്തമാക്കി. രണ്ട് വര്‍ഷം മുമ്പ് ഇന്ത്യയുടെ ചരിത്ര വിജയത്തിന് കാരണമായതില്‍ വലിയ പങ്ക് വഹിച്ചത് പേസ് ബൗളിംഗ് നിരയാണെന്നും അവര്‍ ഇത്തവണയും അവസരത്തിനൊത്തുയരുമെന്നും ഷമി പറഞ്ഞു.

ഒരു കാലത്ത് സ്പിന്നര്‍മാര്‍ക്ക് പേര് കേട്ട ഇന്ത്യയില്‍ നിന്ന് ഇന്ന് ലോകോത്തരമായ ഒരു പേസ് ബൗളിംഗ് നിര തന്നെയാണുള്ളത്. വിദേശത്ത് 61 വിക്കറ്റുകള്‍ നേടിയ ഷമിയുടെ മികവിനെക്കാള്‍ മുന്നില്‍ നില്‍ക്കുന്നത് 68 വിക്കറ്റുമായി ജസ്പ്രീത് ബുംറയാണ്.

ഈ പേസ് ബൗളിംഗ് സംഘത്തിനിടയിലുള്ള സൗഹൃദമാണ് ഇവരുടെ പ്രകടനത്തിലെ മികവിന് കാരണമെന്നും ഷമി സൂചിപ്പിച്ചു. ഒരൊറ്റ ലക്ഷ്യമെന്നതൊഴിച്ചാല്‍ ഈ സംഘത്തിന്റെ വിജയത്തിന് പിന്നില്‍ വേറെ രഹസ്യമൊന്നുമില്ലെന്നും ഷമി സൂചിപ്പിച്ചു.

കൊറോണ മൂലം ലോക്ക്ഡൗണിലാണെങ്കിലും കായിക താരങ്ങള്‍ക്കെല്ലാം അവരുടെ ഫിറ്റ്നെസ്സ് റുട്ടീനുകള്‍ പരിശീലകര്‍ നല്‍കിയിട്ടുണ്ട്. ഓരോ താരങ്ങളും ഏര്‍പ്പെടേണ്ട പരിശീലന മുറകള്‍ കൃത്യമായി അതാത് രാജ്യങ്ങളിലെ കായിക സംഘടനകള്‍ അവരുടെ താരങ്ങള്‍ക്ക് നല്‍കുന്നുണ്ട്. ഇന്ത്യന്‍ ക്രിക്കറ്റ് ടീമിനും സമാനമായ പരിശീലന പരിപാടി അവരുടെ പരിശീലകര്‍ തയ്യാറാക്കിയിട്ടുണ്ട്.

ഈ ലോക്ക്ഡൗണ്‍ കാലത്ത് താനുമായി ഏറ്റവും അധികം സമ്പര്‍ക്കം പുലര്‍ത്തുന്നത് ഇന്ത്യന്‍ പേസര്‍ മുഹമ്മദ് ഷമിയാണെന്ന് പേസ് ബൗളിംഗ് കോച്ച് ഭരത് അരുണ്‍ വ്യക്തമാക്കി. താരം തനിക്ക് എന്നും പരിശീലനത്തിന്റെ വീഡിയോകള്‍ അയയ്ക്കാറുണ്ടെന്നും താന്‍ ഷമിയുമായി നിരന്തരം സംസാരിക്കുകയും താരത്തെ പ്രോത്സാഹിപ്പിക്കുവാന്‍ ശ്രമിക്കാറുമുണ്ടെന്ന് ഭരത് അരുണ്‍ വിശദീകരിച്ചു.

ഇത് പോലെ പരിശീലനത്തില്‍ ഏര്‍പ്പെട്ടാല്‍ ഷമിയുടെ കരിയര്‍ രണ്ട് വര്‍ഷം കൂടുതല്‍ ദൈര്‍ഘ്യമുണ്ടാകുമെന്ന് താന്‍ ഇന്ത്യന്‍ പേസറോട് പറഞ്ഞിട്ടുണ്ടെന്നും ഭരത് വ്യക്തമാക്കി. ഇന്ത്യയ്ക്കായി മൂന്ന് ഫോര്‍മാറ്റിലും ടീമില്‍ ഇടം പിടിച്ചിട്ടുള്ള താരമാണ് മുഹമ്മദ് ഷമി.

തന്റെ ഏറ്റവും പ്രയാസമേറിയ കാലഘട്ടത്തില്‍ തനിക്കൊപ്പം കുടുംബ നിന്നതാണ് തനിക്ക് ക്രിക്കറ്റിലേക്കുള്ള മടങ്ങി വരവ് സാധ്യമായതെന്ന് പറഞ്ഞ് മുഹമ്മദ് ഷമി. താന്‍ പരിക്കേറ്റ് ക്രിക്കറ്റില്‍ നിന്ന് വിട്ട് നില്‍ക്കുന്ന സമയത്താണ് താനും ഭാര്യയും തമ്മിലുള്ള പ്രശ്നങ്ങള്‍ ഉടലെടുക്കുന്നതെന്ന് ഷമി പറഞ്ഞു. അതേ സമയത്ത് തന്നെ താന്‍ കാര്‍ അപകടത്തില്‍ പെടുകയും ചെയ്തു.

അന്ന് ഭാര്യയുമായുള്ള പ്രശ്നം എന്നും മീഡിയയില്‍ ചര്‍ച്ചയാവുന്ന സമയമായിരുന്നു. ആ കാലത്ത് തന്റെ കുടുംബം തനിക്കൊപ്പം നിന്നില്ലായിരുന്നുവെങ്കില്‍ തനിക്ക് ക്രിക്കറ്റ് എന്നെന്നേക്കുമായി നഷ്ടമായേനെ എന്നും ഷമി വ്യക്തമാക്കി. നിങ്ങള്‍ വിശ്വസിക്കുമോ ഇല്ലയോ എന്നറിയില്ല പക്ഷേ താന്‍ മൂന്ന് വട്ടത്തോളം ആത്മഹത്യയെക്കുറിച്ച് ചിന്തിച്ചിരുന്നുവെന്ന് ഷമി വ്യക്തമാക്കി.

തനിക്ക് അത്രമാത്രം സമ്മര്‍ദ്ദം ആ സമയത്ത് ഉണ്ടായിരുന്നുവെന്നും താന്‍ ക്രിക്കറ്റിനെക്കുറിച്ച് ചിന്തിക്കാതിരുന്ന ഒരു ഘട്ടമായിരുന്നു അതെന്നും അതാണ് ആത്മഹത്യ ചിന്തയെല്ലാം തന്റെ മനസ്സിലേക്ക് എത്തിയതെന്നും ഷമി വ്യക്തമാക്കി. അന്ന് തന്റെ ചുറ്റും റൂമില്‍ എന്നും ആളുകളുണ്ടായിരുന്നു. താന്‍ അബദ്ധം ഒന്നും കാണിക്കരുതെന്ന് കരുതിയാണ് അവര്‍ എപ്പോളും തനിക്കൊപ്പം ഇരുന്നത്. താന്‍ ഉറങ്ങിയതെപ്പോളാണ് ഉണരുന്നതെപ്പോളാണ് എന്നൊന്നും തനിക്ക് അറിയില്ലായിരുന്നുവെന്നും ഷമി പറഞ്ഞു.

ഏതൊരു പ്രശ്നത്തിനും പരിഹാരമുണ്ടെന്നായിരുന്നു എന്റെ കുടുംബാംഗങ്ങള്‍ എന്നോട് അന്ന് പറഞ്ഞിരുന്നത്. എല്ലാവരും പ്രശ്നങ്ങളിലൂടെ കടന്ന് പോകുമെന്നും അപ്പോള്‍ പൊരുതുന്നത് ഉപേക്ഷിക്കുന്നത് പരിഹാരമല്ലെന്നും അവര്‍ ഉപദേശിച്ചുവെന്ന് ഷമി വ്യക്തമാക്കി.

മടങ്ങി വരവിന് ശേഷം 37 ടെസ്റ്റില്‍ നിന്ന് 133 വിക്കറ്റ് നേടി മുഹമ്മദ് ഷമി ഇന്ത്യന്‍ പേസ് നിരയുടെ അവിഭാജ്യ ഘടകമായി മാറിയിരുന്നു. ഇന്ത്യയുടെ ടെസ്റ്റ് ഫോര്‍മാറ്റിലെ ഒഴിച്ച് നിര്‍ത്താനാകാത്ത ഘടകമായി ഷമി ചുരുങ്ങിയ കാലത്തിനുള്ളില്‍ മാറിക്കഴിഞ്ഞിരുന്നു.

2015ലെ അവിസ്മരണീയമായ ലോകകപ്പ് പ്രകടനത്തിന് ശേഷം കാല്‍മുട്ടിലെ പരിക്ക് മൂലം 18 മാസത്തോളം ക്രിക്കറ്റില്‍ നിന്ന് വിട്ട് നിന്നതാണ് തന്റെ ജീവിതത്തിലെ ഏറ്റവും പ്രയാസമേറിയ കാലഘട്ടമെന്ന് പറഞ്ഞ് മുഹമ്മദ് ഷമി. 2015 ഏകദിന ലോകകപ്പില്‍ ഇന്ത്യന്‍ താരം ടൂര്‍ണ്ണമെന്റിലെ നാലാമത്തെ മികച്ച വിക്കറ്റ് നേട്ടക്കാരനായിരുന്നു. 17 വിക്കറ്റാണ് താരം അന്ന് ടൂര്‍ണ്ണമെന്റില്‍ നിന്ന് നേടിയത്.

പരിക്കുമായാണ് താരം ടൂര്‍ണ്ണമെന്റ് കളിച്ചത്. അതിന് ശേഷം ലോകകപ്പ് കഴിഞ്ഞ ശേഷം 18 മാസമാണ് തനിക്ക് പൂര്‍ണ്ണമായും ഭേദപ്പെട്ട് തിരികെ ക്രിക്കറ്റിലേക്ക് എത്തുവാന്‍ എടുത്തതെന്നും ഷമി പറഞ്ഞു. റീഹാബ് നടപടികള്‍ എന്നും പ്രയാസകരമായ കാര്യമാണ്, ഒട്ടേറെ ബുദ്ധിമുട്ടുകള്‍ താന്‍ അന്ന് അനുഭവിച്ചുവെന്നും താരം വ്യക്തമാക്കി.

തിരികെ ക്രിക്കറ്റിലേക്ക് എത്തിയപ്പോള്‍ തനിക്ക് തലവേദനയായി കുടുംബത്തിലെ പ്രശ്നങ്ങളും അതിനൊപ്പം തന്നെ താന്‍ ഒരു കാര്‍ ആക്സിഡന്റിലും ഉള്‍പ്പെട്ടുവെന്നു ഷമി പറഞ്ഞു. 2018 ഐപിഎലിന് തൊട്ടു മുമ്പാണ് തനിക്ക് കാര്‍ അപടകം ഉണ്ടാകുന്നത്. അതേ സമയം തന്നെ മീഡിയയില്‍ തന്റെ കുടുംബ പ്രശ്നം ചര്‍ച്ചയായി നില്‍ക്കുകയായിരുന്നുവെന്നും ഷമി വ്യക്തമാക്കി.